Në kuadër të festimeve të 17-vjetorit të Pavarësisë së Republikës së Kosovës, Presidentja Vjosa Osmani ka organizuar një ceremoni solemne ku ndau Dekorata Presidenciale. Gjatë kësaj ceremonie, ajo ka nderuar familjen Jashari, duke i njohur sakrificën e jashtëzakonshme të çdo anëtari të saj që qëndroi dhe luftoi për lirinë e Kosovës, shkruan Katror.info.
Presidentja Osmani theksoi se ky 17-vjetor është një moment i shenjët për të nderuar historinë dhe sakrificën e kombit shqiptar, duke e bërë bashkë këtë moment të lavdishëm në një akt solemniteti. Ajo po ashtu theksoi se dekorimi është një akt që i njeh ata që e bënë Kosovën të lirë dhe të gjithë ata që vazhdojnë të kontribuojnë për të ardhmen e vendit.
“Në këtë ditë të shenjtë, në këtë moment solemn, ne nuk po përkujtojmë vetëm një datë – ne po nderojmë një epokë të lavdishme! 17 vjet liri, 17 vjet shtet, 17 vjet betejë për t’i treguar botës se Kosova është e përjetshme”, tha Presidentja Osmani.
Mundesh me e lexu edhe...
Ajo shtoi se është e drejtë që komandantët dhe heronjtë si Adem Jashari dhe Hamza Jashari janë nderuar me Urdhrin Heroi i Kosovës, dhe se sot, titulli Hero i Kosovës iu ndahet edhe Shaban Jasharit, kryefamiljarit të familjes Jashari. Me këtë rast, Presidentja njoftoi se, për herë të parë, familja Jashari si një e tërë do të dekorohen për heroizmin dhe sakrificën e saj.
Ky moment, siç theksoi Osmani, është i rëndësishëm për të riafirmuar se shteti i Kosovës e nderon dhe respekton sakrificën më sublime të historisë moderne të vendit.
Presidentja Vjosa Osmani, në 17-vjetorin e Pavarësisë sonë gjithashtu ka ndarë titullin “Urdhri i Lirisë”, për gjithë familjen Jashari nga Prekazi.
Për kontributin dhe sakrificën “Urdhri i Lirisë” post-mortem iu dha dhe gjithë familjes Jashari e cila bashkë me të afërm e fqinj u vra barbarisht nga forcat serbe në mars të vitit 1998.
Dekorata me titull “Urdhri i Lirisë”, iu nda nga presidentja Osmani me motivacionin për kontributin dhe sakrificën e jashtëzakonshme për lirinë e Kosovës për betejën e Prekazit më 5,6,7 mars 1998.
Vajza e heroit të kombit, Hamëz Jashari, tha se rruga deri te Pavarësia nuk ka qenë e lehtë, teksa falënderoi edhe shtetet që e kanë ndihmuar Kosovën në shtet ndërtim.
“Jam e nderuar që jam në mesin e juaj për 17-vjetorin e Pavarësisë. Duke qenë sot që prezenca ime ka qenë me atë që përfaqësoj, po e nisë me thënien e Hamëz Jasharit, ku thoshte ‘ndoshta fitohet liria me laps po neve në Kosovë na mungojnë varrezat e dëshmorëve’. Populli i Kosovës gjithmonë ka dashur dhe kërkuar lirinë, rruga deri në 17 shkurtin e vitit 2008 nuk ka qenë e lehtë, është dashur edhe veprim edhe vet mohim, andaj faleminderit edhe kombeve që na kanë mbështetur dhe Shteteve te Bashkuara të Amerikës, sot me kënaqësi të veçantë pasi po nderojmë 59 dëshmorët e Prekazit”, u shpreh ajo.
Përveç familjes Jashari, Presidentja Osmani ka dekoruar edhe Fehmi dhe Xhevë Lladrovcin me Urdhrin “Hero i Kosovës” për luftën e tyre të përbashkët për lirinë e Kosovës.
“Me të njëjtin frymëzim, sot i dorëzojmë Urdhrat Hero i Kosovës edhe për Fehmi dhe Xhevë Lladrovcin, dy bashkëluftëtarë dhe bashkëshortë që ranë ashtu siç jetuan – bashkë, me armët në duar dhe me idealin e lirisë të ngulitur në shpirt,” përfundoi Presidentja./Katror.info
Përgatiti:
