Më shumë se 1000 muzikantë – përfshirë Annie Lennoxin, Damon Albarnin dhe Kate Bushin – kanë publikuar një “album të heshtur” të martën në shenjë proteste ndaj planeve të Qeverisë së Mbretërisë së Bashkuar për të ndryshuar ligjin për autorësi, që do t’ua lehtësonte kompanive të inteligjencës artificiale të shfrytëzojnë punën e dikujt tjetër, pa pasur nevojë për licencë fare.
Me propozimet e reja, zhvilluesit e inteligjencës artificiale do të jenë në gjendje të përdorin përmbajtjen e krijuesve në internet, për të ndihmuar t’i zhvillojnë modelet e tyre, përveç në rastet kur autorët vendosin “të çregjistrohen”, shkruan Koha.net.
Artistët shpresojnë që albumi i titulluar “Is This What We Want?” (A është kjo ajo që duam?) të marrë vëmendjen për ndikimin potencial të AI-së në jetë dhe në industrinë muzikore britanike.
Mundesh me e lexu edhe...
Të gjitha të hyrat nga shitja e albumit do t’i ndahen organizatës “Help Musicians”.
“Në muzikën e së ardhmes, a do të kalojnë zërat tonë pa u dëgjuar?” ka thënë Kate Bush në një komunikatë për media.
Albumi ka marrë mbështetjen e disa emrave të njohur në Britani – përfshirë Billy Ocean, Ed O’Brien i “Radiohead”, Dan Smith i “Bastille”, The Clash, Mystery Jets. Ky album përmban performanca pa zë, që tregon frikën e artistëve për ndikimin potencial të ndryshimeve të propozuara në ligj.
Lista e këngëve thjesht thekson fjalët “Qeveria Britanike nuk duhet të legalizojë vjedhjen e muzikës në të mirë të kompanive të AI-së”.
Qeveria aktualisht është duke u konsultuar mbi propozimet që do t’ua lejonin kompanive të AI-së të përdorin materiale që është në dispozicion online, pa respektuar të drejtën e autorit.
Programet e gjeneruara nga AI-ja shfrytëzojnë të dhëna si tekste, fotografi apo muzikë online për të gjeneruar përmbajtje të re e cila ngjan në diçka si të krijuar prej njeriut.
Propozimet do t’u jepnin artistëve apo krijuesve një të “drejtë mbi autorësinë”. Por kritikët e planit besojnë se s’është e mundshme që një tekstshkrues apo artist të njoftojë mijëra ofrues të shërbimeve të AI-së se nuk duan që një punë e tyre të përdoret në një mënyrë, ose edhe ta monitorojnë se çka ka ndodhur me punën e tyre në të gjithë internetin.
Një zyrtar i Departamentit për Shkencë, Inovacion dhe Teknologji (DSIT) ka thënë në një deklaratë të martën se “rregullat aktuale të Mbretërisë së Bashkuar për të drejtën e autorit dhe AI-në po e mbajnë të cunguar industrinë kreative, mediat dhe sektorin e AI-së nga realizimi i potencialit të plotë – dhe kështu s’mund të vazhdohet”.
“Prandaj ka konsultime në përpjekjet e reja për të mbrojtur interesin e zhvilluesve të AI-së dhe të autorëve, që të ofrohet një zgjidhje për t’iu përshtatur të dyjave që të shkëlqejnë”, thuhet në deklaratën e tij. “Ende s’ka asnjë vendim apo lëvizje dhe ato do të bëhen kur të ka besim të plotë se do të ketë plan praktik për t’i arritur qëllimet”.
“Shkatërrim për muzikantët”
Imogen Heap, Yusuf aka Cat Stevens dhe Riz Ahmed po ashtu kanë mbështetur albumin e heshtur.
Kompozitori Max Richter, një prej artistëve të përfshirë në album, ka thënë se planet jo vetëm që kanë ndikim te muzikantët, “por varfërojnë krijuesit” nga tekstshkruesit te artistët vizualë e më teje.
Organizatori i albumit të heshtur, Ed Newton-Rex, ka thënë se propozimi jo vetëm që është “shkatërrues” për muzikantët në Britani të Madhe, por ai e ka quajtur “totalisht të panevojshëm”. Sipas tij, shteti “mund të jetë lider në AI pa hedhur poshtë industritë kreative”.
Ai ka thënë se albumi i ri ka treguar se “si qeveria po përpiqet ta justifikojë ndryshimin e propozuar”.
“Nuk mund të lihemi kështu anash nga qeveria dhe të na vidhet puna për të përfituar kompanitë e mëdha teknologjike”, ka thënë këngëtarja dhe tekstshkruesja Naomi Kimpenu.
Ajo ka thënë se plani do t’i zbehte shanset për sukses të shumë artistëve të rinj
Në janar, legjenda Paul McCartney pati thënë për BBC-në se propozimi i ri ligjor ia mundëson teknologjisë “t’ua bëjë të pamundur jetesën muzikantëve”.
Në një letër për “The Times”, nënshkruesit ishin ankuar se ligji do t’ua mundësonte kompanive të mëdha teknologjike t’i sulmojnë sektorët krijues.
Dua Lipa ishte në mesin e yjeve që ka kundërshtuar planet për të ndryshuar ligjin për të drejtën e autorit./Katror.info
Përgatiti:
