Innovation Centre Kosovo (ICK), në bashkëpunim me LuxDev, Agjencinë për Bashkëpunim Zhvillimor të Luksemburgut, ka hapur aplikimet për bursa të plota për aftësim profesional dhe punë praktike me pagesë për të rinjtë nga Kosova, shkruan Katror.info.
Ky program zhvillohet në kuadër të nismës “GreenTech”, e cila synon të mbështesë të rinjtë në ndërtimin e një karriere në sektorin e teknologjisë së informacionit dhe komunikimit (TIK) si dhe në fushën e energjisë së ripërtëritshme.
Afati i fundit për aplikim është 30 mars 2025.
Mundesh me e lexu edhe...
GreenTech është një komponent kyç i Programit “TechEco Pathways”, një iniciativë transformuese e financuar nga LuxDev me qëllim të promovimit të inovacionit dhe qëndrueshmërisë në Kosovë. Ky program, i cili do të zgjasë dy vjet, synon të përgatisë të rinjtë për tregun e punës përmes trajnimeve profesionale dhe eksperiencës praktike. Krahas GreenTech, programi përfshin edhe dy nisma të tjera: DevelopHer, e cila fokusohet në përgatitjen e vajzave dhe grave në fushën e programimit, sigurisë kibernetike dhe industrive kreative, si dhe Innovation Challenges, një platformë që organizon gara inovative për zgjidhje teknologjike në ruajtjen e energjisë, përmirësimin e efiçiencës dhe zhvillimin e qyteteve inteligjente.
Në kuadër të GreenTech, ICK dhe LuxDev planifikojnë të organizojnë dhjetë trajnime profesionale për mbi 120 të rinj nga Kosova, duke u ofruar mundësi për punë praktike me pagesë, mentorim nga ekspertë të fushës dhe pjesëmarrje në dy edicione të garave inovative me shpërblime për fituesit. Aktualisht, janë të hapura aplikimet për programet e inteligjencës artificiale dhe energjisë solare, të cilat ofrojnë një mundësi të veçantë për të rinjtë e interesuar të zhvillojnë aftësitë e tyre në këto fusha me perspektivë të lartë.
Për të aplikuar, kandidatët duhet të dërgojnë aplikimet e tyre deri më 30 mars 2025. Pas përzgjedhjes, kandidatët do të ftohen për një testim me shkrim, i cili do të mbahet në ambientet e ICK në Prishtinë. Rezultatet e testit do të publikohen më 3 prill, ndërsa ligjëratat për të pranuarit do të fillojnë më 7 dhe 8 prill 2025.
Ky program mbështetet nga projekti “Shkathtësi për punësim të qëndrueshëm në Kosovë”, i financuar nga Dukati i Madh i Luksemburgut dhe i zbatuar nga LuxDev. Për më shumë informata mbi programin, afatet dhe mënyrën e aplikimit, të interesuarit mund të vizitojnë uebfaqen zyrtare të ICK.
Kilko këtu për më shumë informata rreth programeve, afateve dhe aplikimit./Katror.info
Përgatiti:
