Iniciativa qytetare “Kosova Bojkoton” të enjten shpalosi një mbishkrim gjigant, “15 MARS, KOSOVA BOJKOTON, TË GJITHA SUPERMARKETET”, duke paralajmëruar aksionin e tyre të radhës për Ditën Ndërkombëtare të Konsumatorit, shkruan Katror.info.
Ky bojkot është pjesë e një lëvizjeje më të gjerë rajonale, e organizuar në bashkëpunim me grupe nga vende të tjera të Ballkanit, për të rritur ndërgjegjësimin mbi fuqinë e konsumatorëve dhe për të adresuar shqetësimet në lidhje me rritjen e padrejtë të çmimeve të produkteve bazë.
Një nga mbështetësit e kësaj iniciative është organizata kroate “Halo, inspektore”, e cila në muajt e fundit ka udhëhequr një sërë protestash dhe bojkotesh kundër çmimeve të larta në Kroaci, duke shkaktuar një efekt zinxhir të ndërgjegjësimit qytetar në gjithë rajonin.
Mundesh me e lexu edhe…
“Edhe pse ne (përkohësisht) kemi pezulluar bojkotet e përgjithshme dhe specifike, miqtë tanë në rajon po vazhdojnë. Të frymëzuar pjesërisht nga puna jonë dhe nga rritja e çmimeve e produkteve ushqimore, organizatorët e nismës “Kosova Bojkoton” po organizojnë një bojkot të përgjithshëm të supermarketeve në Republikën e Kosovës më 15 mars, me rastin e Ditës Botërore të të Drejtave të Konsumatorit.
Duam t’i mbështesim në këtë aksion, por edhe të theksojmë rëndësinë e bashkëpunimit të ndërsjellë për mbrojtjen e konsumatorëve në nivel rajonal, evropian dhe global”, thuhet në reagimin e “Halo, inspektore”.
“Vetëdija e konsumatorit është një proces afatgjatë dhe shpesh i pakëndshëm. Por është gjithashtu i pandalshëm. Miliona konsumatorë në rajonin Adriatikut dhe Jonit – nga Kroacia, Bosnja dhe Hercegovina, Serbia dhe Mali i Zi, deri në Kosovë, Maqedoninë e Veriut dhe Shqipëri – tashmë e kanë kuptuar këtë.
Prandaj, nëse ndodheni në Kosovë më 15 mars, bojkotoni edhe ju! Tregoni solidaritet me ata që përpiqen të forcojnë zërin e konsumatorëve në një shoqëri që nënvlerëson forcën dhe fuqinë e tyre në treg, ku politikanët jetojnë në një botë paralele, të shkëputur nga realiteti”, thuhet tutje në thirrjen e “Halo, inspektore”.
Organizatorët e “Kosova Bojkoton” i bëjnë thirrje qytetarëve që më 15 mars të mos bëjnë blerje në asnjë supermarket, duke dërguar një mesazh të qartë se konsumatorët nuk do të tolerojnë më rritjen abuzive të çmimeve dhe mungesën e mbrojtjes nga institucionet përgjegjëse./Katror.info
Përgatiti:
