Me inteligjencën artificiale (AI) të zbatuar tashmë në pothuajse gjysmën e kompanive të mëdha të BE-së, një Eurobarometër i ri zbulon një qasje të përzier nga punonjësit: optimizëm për përfitimet, por edhe frikë për humbjen e vendeve të punës.
Sipas sondazhit, 66% e punonjësve në BE besojnë se AI dhe teknologjitë dixhitale po e përmirësojnë punën e tyre, ndërsa 21% mendojnë se ndikimi i tyre është negativ. Malta kryeson listën e vendeve më optimiste (85%), e ndjekur nga Suedia (78%) dhe Lituania (76%).
Nga ana tjetër, Rumania (32%), Italia (25%) dhe Portugalia (24%) janë ndër vendet më skeptike ndaj AI, me një lidhje të dukshme mes mungesës së aftësive teknologjike dhe perceptimit negativ. Rumania ka gjithashtu përqindjen më të ulët të punonjësve që ndihen të aftë në përdorimin e AI (56%), e ndjekur nga Hungaria (60%) dhe Greqia (63%).
Mundesh me e lexu edhe...
AI në punë: Siguri apo kontroll?
Sa i përket përdorimit të AI në vendin e punës, shumica e të anketuarve duan që ajo të garantojë sigurinë e punonjësve (67%), por janë më pak dakord për rolet e tjera, si monitorimi i punës (31%), vlerësimi i performancës (36%) ose madje pushimi automatik nga puna (16%).
Megjithatë, disa vende si Polonia (33%), Rumania (28%) dhe Qiproja (25%) kanë një përqindje më të lartë të njerëzve që mbështesin përdorimin e AI për të shkarkuar punonjësit automatikisht.
Frika për humbjen e punëve mbetet e lartë
Pavarësisht qëndrimit më pozitiv ndaj AI, 66% e punonjësve në BE ende kanë frikë se automatizimi do të shkaktojë humbje të vendeve të punës, një shifër që ka rënë lehtë nga 72% pesë vjet më parë.
Një raport i Forumit Ekonomik Botëror parashikon se AI mund të shkaktojë humbjen e 83 milionë vendeve të punës në mbarë botën në tre vitet e ardhshme. Sektorët më të rrezikuar në Evropë janë shërbimet ushqimore, artet dhe tregtia me shumicë e pakicë, sipas firmës konsulente McKinsey.
Nga ana tjetër, shumica e të anketuarve (73%) pajtohen se AI mund të rrisë ritmin e punës, duke sjellë përfitime për efikasitetin dhe produktivitetin.
Dallime në bazë të moshës dhe gjinisë
Të rinjtë janë më entuziastë për AI: 71% e të anketuarve të moshës 15-24 vjeç besojnë se teknologjitë e reja ndikojnë pozitivisht në punën e tyre, krahasuar me 61% të grupmoshës 55+.
Gjithashtu, burrat ndihen më të aftë në përdorimin e teknologjive dixhitale dhe AI në jetën e tyre të përditshme (73% kundrejt 67% të grave), duke reflektuar ende një hendek gjinor në fushën e teknologjisë.
Në përgjithësi, sondazhi sugjeron se AI po fiton pranueshmëri në vendin e punës, por sfidat mbeten, sidomos në rritjen e aftësive teknologjike dhe menaxhimin e pasojave të automatizimit./Katror.info
Përgatiti:
