Oda Ekonomike e Kosovës (OEK) ka organizuar tryezë diskutimi mbi zhvillimet e fundit në sektorin e energjisë, me fokus të veçantë në hapjen e tregut të energjisë elektrike, siç është njoftuar nga Zyra e Rregullatorit të Energjisë (ZRrE), shkruan Katror.info.
Qëllimi i diskutimit ishte informimi i bizneseve mbi ndryshimet e reja në tregun e energjisë, ndikimin e tyre në operacionet dhe kostot e bizneseve, si dhe mundësitë që ky treg i hapur mund të sjellë. Një nga shqetësimet kryesore të ngritura nga komuniteti i biznesit ishte afati i shkurtër për kalimin në treg të hapur, veçanërisht për sektorin e prodhimit, i cili mund të përballet me sfida të mëdha në këtë proces.
Kryetari i Odës Ekonomike të Kosovës, Lulzim Rafuna, pas takimit me bizneset, ka kërkuar që të shtyhet vendimi për shtrenjtimin e energjisë elektrike së paku për një vit, pasi sipas tij, vendimi është marrë në kohë të shkurtër dhe nuk ka pasur kohë që bizneset të përgatiten.
Mundesh me e lexu edhe…
Rafuna ka thënë se në takimin me bizneset, kërkesa e tyre ka qenë që të shtyhet ky vendim si dhe që institucionet e Kosovës të subvencionojnë sektorin e prodhimit.
“Patëm një mundësi t’i dëgjojmë shqetësimet e biznesit. Shqetësimet më të mëdha ishin te bizneset e prodhimit, ku do të ketë efekt zinxhiror, do të rrit koston e produktit që më pas do të bartet tek konsumatori. Është kërkesë të shqyrtohet mundësia të shtyhet të paktën për një vit ky vendim. E dyta kërkesë drejtuar institcioneve të Kosovës është që sektori i prodhimit të subvencionohet. Kërkesa e të gjithëve është që të shtyhet së paku për një vit implementimi i këtij vendimi, sepse ka sfida të tjera dhe kjo sfidë shtesë është shumë. Do të ketë rritje të papunësisë dhe tkurrje të prodhimit vendor të Kosovës. Kërkesa e OEK-ut është që kjo të shtyhet. Nuk jemi kundër vendimit, por koha është shumë e shkurtër. Nuk ka pasur kohë që biznesi të përgatitet. Kërkesa tjetër që vjen për partite politike është sa më shpejt të kemi të themeluara institucionet e vendit, në mënyrë që të kemi kujt me iu adresua”, ka thënë Rafuna në konferencë për media.
./Katror.info
Përgatiti:
