“Gëzimi në fytyrën e fëmijëve është ndjenjë që nuk mund të përshkruhet. Duhet me qenë prezentë me pa një lodër ose dhuratë kur ia jep, momenti është pa fjalë.”
Këtë gëzim, studentja Agnesa Bejtullahu ua dhuron tash një vit fëmijëve të SOS Fshatrave në Prishtinë. Përveç familjes së saj në Suharekë, Agnesa tashmë është mike e ngushtë e “familjes më të madhe në Kosovë”.
Kjo krejt falë angazhimit të saj për t’i ndihmuar fëmijët e braktisur të SOS Fshatrave. Pavarësisht faktit që ende është në studime për Inxhinieri të Ambientit dhe punon në një prej lokaleve të gastronomisë në kryeqytet, në baza mujore ajo kontribuon për 39 fëmijët që ky institucion i ka në përkujdesje.
Mundesh me e lexu edhe…
“Çuditërisht sot një vit është dita e parë kur kam ardhur këtu, që kam dhuruar diçka vetë vullnetarisht. Mirëpo tash jam më e afërt me SOS Fshatin dhe fëmijët në përgjithësi,” thotë Agnesa në një intervistë për Katror.info.
Njohja e saj me SOS Fshatrat ka ardhur pikërisht nëpërmjet stafit, për të cilët ka veç fjalë të mira.
“Më përpara më ka lënë përshtypje stafi, janë ekstrem shumë të mrekullueshëm. Në çdo tubim apo manifestim që e kanë SOS Fshati mundohem të jem këtu. E dalloj lidhjen që e kanë fëmijët me edukatoret me çdo person të stafit edhe më lë përshtypje qysh i trajtojnë fëmijët shumë mirë.”
Në fillim Agnesa kishte ndihmuar fëmijët e SOS Fshatrave me dhurata fizike, deri dëgjoi për format online të kontribuimit.
“Për herë të parë kam dhuruar diçka vullnetarisht pije apo ëmbëlsira. Pas një kohe kur e kam marrë vesh që kanë edhe forma të ndryshme të dhurimit për shembull e kanë linkun në Instagram, webfaqe apo Facebook. Është një formë me dhuru online, është mënyrë më e shpejtë dhe mund ta bësh kurdo që ti dëshiron.”
Shpend Juniku nga SOS Fshatrat tregon se aktualisht fëmijët janë të ndarë në 8 ‘SOS familje’, ku përkujdesjen e kanë nga ‘SOS nana’ apo ‘SOS tezja’. Pas moshës 18 vjeçare, ata shkëputen fizikisht nga kjo mënyrë e jetesës, për të vazhduar me përkrahje ekonomike e emocionale.
“Në qoftë se kemi nevojë për fletore, një kompani mund t’i dhurojë donacion por edhe mund t’i mbështesë projektet me impakt më të madh. Të tjera forma të dhurimit janë përmes webfaqes, kushdo që e sheh të arsyeshme me dhuru për SOS Fshatrat e fëmijëve, mund të kyçet në webfaqe që është soskosova. org, e ka mundësinë “dhuro” dhe aty mundet me dhuru.”
Ndërkaq pikërisht për Ditën Ndërkombëtare të Fëmijëve, ata kanë nisur kampanjën “Dhuro 1 orë punë, për 1 qershor”.
“E kemi llogaritur një ore pune sa paguhet në Kosovë, mesatarisht është 5 euro. E kemi marrë edhe rrogën më të madhe edhe më të ulët. Ka pasur kompani që na u kanë bashkangjitur në këtë fushatë si Cost, Banka Private e Biznesit duke dhuruar një shumë të konsiderueshëm të orëve. Por nuk është vetëm për kompanitë, është edhe për individët, kushdo që dëshiron me dhuru një orë të tij të punës jo veç 5 euro por edhe 2.5 euro apo 50 euro mund t’i dhurojnë përmes webfaqes sonë.”
Numri i atyre që kontribuojnë në baza mujore varion nga kohë në kohë. Mirëpo nevoja e shtimit të aktivistëve si Agnesa është gjithnjë e dukshme.
“I bëj thirrje krejtve kushdo që ka mundësi, si të rinj e të reja, a je 20 vjeç apo i moshuar, ne mund të kontribuojmë edhe me 1 euro. 1 euro nëse e ndan në arkën e kursimeve, mirëpo qëllimin që e vendos ti…Unë kam vendosur çdo muaj të dhuroj online për fëmijët e SOS Fshatrave.”
SOS Fshatrat aktualisht janë në përkujdesje të 39 fëmijëve të braktisur. Ndërkaq në mënyre indirekte kujdesen për 600 fëmijë që kanë rrezik të braktisjes./Katror.info
Edicionin #10 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
