Tre italianë janë bërë ekuipazhi i parë që kanë fluturuar me fluturimin e parë komercial të Virgin Galactic në skajin e hapësirës. Ngritja u krye pa asnjë problem dhe anija kozmike ISS Unity u nda pa asnjë problem nga anija e saj mëmë dhe preku skajin e hapësirës në një lartësi prej 80 kilometrash nga sipërfaqja e Tokës.
Gjatë disa minutave pa peshë, ishte e mundur të shiheshin astronautët duke lëvizur rreth kabinës së anijes dhe duke kryer eksperimente të caktuara.
Siç njoftoi Virgin Galactica, dy oficerë të Forcave Ajrore Italiane dhe një inxhinier aeronautik nga Këshilli Kombëtar i Kërkimeve të Italisë ishin në bordin e anijes kozmike të ndërtuar posaçërisht. Atyre iu bashkuan dy pilotë të kësaj anije kozmike dhe një instruktor nga Virgin Galactica.
Gjatë fluturimit, i cili duhet të zgjaste rreth 90 minuta, anija kozmike i çoi në një lartësi prej rreth 80 kilometrash mbi shkretëtirën në New Mexico. Anija kozmike u ngrit nga Spaceport America në New Mexico, e bashkangjitur me një avion transportues. Kur arriti një lartësi prej rreth 15 kilometrash, ISS Unity u nda nga transportuesi dhe fluturoi me shpejtësi supersonike. Në kulmin e ngjitjes, anija mbylli motorët dhe ekuipazhi u gjend në një gjendje pa peshë. Disa minuta më vonë, anija kozmike u rikthye në atmosferë dhe filloi zbritjen në Tokë.
Fluturimi, i emërtuar Galactic 01, pasoi dy vjet pasi themeluesi i kompanisë, Richard Branson dhe ekipi i tij i bashkëpunëtorëve kryen fluturimin e parë testues të kompanisë me një ekuipazh të plotë në ISS Unity.
Edhe pse në atë kohë u njoftua se fluturimet komerciale do të pasonin së shpejti, përfundimi i vetë testimit zgjati më shumë sesa pritej në Virgin Galactic. Për shkak të hetimeve nga autoritetet rregullatore, avionët nuk kanë mundur të fluturojnë për 11 javë, gjë që ka zgjatur të gjithë procesin. Fluturimi i fundit testues u krye pa shumë bujë pesë javë më parë, kur u konstatua se gjithçka ishte gati për fluturime komerciale.
Ndryshe nga fluturimet e mëparshme, që ishin provë, ky fluturim përveçse fluturimi i parë komercial, ishte edhe fluturimi i parë shkencor. Gjegjësisht, italianët planifikojnë të mbledhin një seri të tërë të dhënash biometrike, të masin performancën njohëse dhe të bëjnë një eksperiment të vogël me lëngje në mikrogravitet.
Një nga pilotët italianë, Walter Villadei, e përdori këtë fluturim si pjesë e trajnimit të tij të astronautëve për të shkuar në Stacionin Ndërkombëtar të Hapësirës.
Virgin Galactic planifikon të rifillojë fluturimet komerciale në fillim të gushtit. Siç theksojnë ata, 1000 klientët e parë paguajnë rreth 250 mijë dollarë për vend.
Kompania tha se ata planifikojnë të ndërtojnë një flotë të tërë avionësh të tillë që mund të kryejnë 400 fluturime në vit.
Sa për kujtesë, edhe pse Virgin Galactic reklamon fluturimet e saj si “fluturim në skajin e hapësirës”, ka një debat se ku është saktësisht ai skaj. NASA dhe Forcat Ajrore të SHBA-së e përcaktojnë atë në një lartësi prej 80 kilometrash e më shumë nga sipërfaqja e Tokës, ndërsa Blue Origin thekson se ata fluturojnë në më shumë se 100 kilometra nga sipërfaqja. Të gjithë ata që kalojnë atë “kufi” konsiderohen astronautë. /Katror.info
Përgatiti:
