Kosova ka arritur ta marrë titullin e një shteti donator, krahas shtetit përfitues siç ka qenë deri më tani në raport me Bankën Botërore.
Me qëllim që të përçojë mesazh në botë, Kosova ka marrë vendim që të bëhet donatore në Agjencinë Ndërkombëtare për Zhvillim (IDA) – agjenci që është krah i Bankës Botërore, e që ndihmon shtetet në zhvillim, siç e ka ndihmuar edhe Kosovën qe 15 vjet.
Për ciklin 21 të kësaj agjencie, Kosova do të jetë në mesin e shteteve tjera që do të japin donacione për shtetet e varfëra e që janë në proces të zhvillimit.
Mundesh me e lexu edhe...
Kosova, sipas ministrit të Financave Hekuran Murati, do të japë 1.4 milionë dollarë për katër vitet e ardhshme të këtij cikli nga 30 miliardë sa do të jenë gjithsej nga krejt shtetet e tjera, shkruan Kallxo.com.
Ministri i Financave, Punës dhe Transfereve, Hekuran Murati, në një konferencë të përbashkët me zëvendës-presidentin e Bankës Botërore për Financimin e Zhvillimit, Akihiko Nishio, e ka cilësuar moment historik ngjarjen.
“Si shtet përfitues ne kemi përfituar shumë më shumë e vazhdojmë të përfitojmë. Nëse e marrim vetëm një nga marrëveshjet, për shembull financimin e politikave zhvillimore që po pret ratifikimin në Kuvend, me vlerë 90 milionë euro, kosotoja e interesit është shumëfish më lartë se kontibuti jonë”- tha Murati në konferencë për media së bashku me zëvendëspresidentin i Bankës Botërore për Financimin e Zhvillimit, Akihiko Nishio.
“Kontratat e nënshkruara dhe të ratifikuara deri më tani janë 376 milionë euro, ndërkaq mbështetja që është disbursuar është 289 milionë euro. Është mbështetje substanciale dhe kemi marrëveshje të tjera që janë ose do të nënshkruhen siç janë ajo për tregti dhe transport; kemi edhe projektin për sistemin informativ shëndetësor, që është nënshkruar dhe pret për ratifikim në Kuvend; projektin për mbështetjen e edukimit të hershëm të fëmijëve dhe shtimin e çerdheve; projekti për zhvillimin e sektorit financiar ku përfshihet edhe mbështetja e Republikës së Kosovës në themelimin e Bankës Zhvillimore dhe marrëveshjen e financimit për politika zhvillimore, në vlerë mbi 90 milionë euro”, ka thënë Murati.
Ndërkaq zëvendës-presidenti i Bankës Botërore për Financimin e Zhvillimit, Akihiko Nishio, ka thënë se Kosova ka dhënë mesazhin e ndihmës ndaj shteteve tjera dhe zhvillimit ekonomik, veçmas në kohën e krizës globale.
“Kosova ka marrë këtë vendim shumë të rëndësishëm që të ndihmojë vendet e varfëra në botë. Përkundër luftës që ka qenë këtu, vendimi i Kosovës për të kontribuar në IDA tregon një rezistencë të jashtëzakonshme, tregon një simbolikë”, ka thënë Akihiko Nishio./Katror.info
Përgatiti:
