Organizata Botërore e Turizmit (UNWTO) shpalli fshatrat turistikë më të mirë në botë këtë javë në Asamblenë e Përgjithshme të saj në Samarkand, Uzbekistan, pasi i zgjodhi ata nga një konkurs me ftesë nga afro 260 destinacione rurale në mbarë botën. Nga të gjithë, 54 u shpallën më të mirët dhe 20 të tjerë u përfshinë në programin e zgjerimit.
Bëhet fjalë për fshatra (apo edhe qytete më të vogla në zonat rurale) që, sipas kritereve të UNWTO-s, janë liderë në edukimin e zonave rurale, ruajtjen e peisazheve, diversitetin kulturor, vlerat lokale dhe traditat e kuzhinës, shkruan Katror.info.
Në listën e 54 fshatrave turistikë më të mirë në botë, UNWTO ka përfshirë në këtë listë edhe një fshat nga rajoni, fshatin kroat Slunj.
Mundesh me e lexu edhe...
Duke komentuar këto çmime, Sekretari i Përgjithshëm i UNWTO-së, Zurab Pololikashvili, theksoi se turizmi kudo mund të jetë një forcë e fuqishme për përfshirjen dhe fuqizimin e komuniteteve lokale dhe se fshatrat që morën çmimet treguan se ata e përdorin turizmin si një katalizator për zhvillimin dhe mirëqenien e tyre.
Nisma për fshatrat turistikë më të mirë u nis nga organizata e sipërpërmendur në vitin 2021 si pjesë e programit “Turizmi për Zhvillim Rural”, i cili inkurajon zhvillimin e turizmit në zonat rurale, por edhe lufton kundër shpopullimit në to dhe për përmirësimin e inovacionit dhe integrimin e zinxhirit të vlerës përmes turizmit dhe praktikave të qëndrueshme.
Përsëri këtë vit, fshatrat u vlerësuan në disa fusha kyçe – burimet kulturore dhe natyrore dhe ruajtja e tyre, qëndrueshmëria ekonomike, sociale dhe ekologjike, zhvillimi i turizmit dhe integrimi i zinxhirit të vlerës, menaxhimi i turizmit, infrastruktura dhe lidhja, si dhe shëndeti dhe siguria.
UNWTO do të mbështesë fshatrat, 20 prej tyre, të cilët janë përzgjedhur për programin e përmirësimit në rrugën e tyre për të përmbushur kriteret për njohje.
“Rrjeti i fshatrave turistikë më të mirë në fakt përfaqëson një hapësirë për shkëmbimin e përvojave dhe praktikave të mira dhe të mësuarit, si dhe për kontributin e ekspertëve dhe partnerëve nga sektori publik dhe privat, të cilët janë të angazhuar në promovimin e turizmit si nxitës të zhvillimit rural”, thekson kjo organizatë.
Me 74 fshatra të rinj, ky rrjet është rritur në 190 dhe përveç Slunjit, ndër 54 më të mirët për vitin 2023 janë p.sh Al Sela nga Jordania, Barrancas në Kili, Cantavieja në Spanjë, Dongbaek në Republikën e Koresë, Ericeira në Portugali, Jalpa de Canovas në Meksikë, Lerici në Itali, Morcote në Zvicër, Schladming në Austri, Shirince në Turqi, Tokaj në Hungari, Zhagana në Kinë etj.
UNWTO ka njoftuar gjithashtu se do të bëjë një thirrje të re për aplikime në muajt e parë të 2024. /Katror.info
Përgatiti:
