Gazeta spanjolle OK Diario shkruan se finalja e Ligës së Kampionëve 2030 do të luhet në Abu Dhabi si pjesë e marrëveshjes së re gjashtëvjeçare të UEFA-s me Emiratet e Bashkuara Arabe. Ky vend i pasur do t’i paguajë UEFA-s 2.2 miliardë euro. Kjo marrëveshje mes UEFA-s dhe Emirateve të Bashkuara Arabe është një përgjigje ndaj vendimit të gjykatës lidhur me projektin e Superligës së Evropës në futboll, që pritet së shpejti në Luksemburg.
“UEFA e di se më 21 dhjetor mund të humbasë padinë në Gjykatën e Drejtësisë së Bashkimit Evropian në lidhje me Superligën dhe ranë dakord me Abu Dhabin për të sponsorizuar Ligën e Kampionëve. Ata duan ta bëjnë atë më tërheqëse për klubet dhe të shmangin dezertimin e tyre në Superligë”, tha gazetari i mirëinformuar spanjoll Eduardo Inda në emisionin El Chiringuito de Jugones. Vendimi duhet të zyrtarizohet më 7 shkurt, përpara shortit të Ligës së Kombeve.
UEFA, shkruajnë spanjollët, do të shesë të drejtat për të gjitha garat e saj, përfshirë futbollin e femrave dhe futsallin, për Lindjen e Mesme. Njeriu kryesor në negociatat nga pala e UEFA-s është Giorgio Marchetti, i cili konsultohet me bordin ekzekutiv për të siguruar që gjithçka të shkojë mirë.
Mundesh me e lexu edhe…
Marrëveshja përfshin një atë në lidhje me mbulimin e të drejtave të transmetimit televiziv të të gjitha garave të klubeve të UEFA-s. Abu Dhabi do të jetë përgjegjës për sigurimin e stadiumeve, akomodimit dhe transportit për finalet e ndryshme të UEFA-s, të cilat do të zhvillohen në Emirate. Pika kryesore do të jetë finalja e Champions League në sezonin 2029/2030, për të cilën tashmë është e sigurt që do të zhvillohet në Abu Dhabi, shton burimi spanjoll.
Me këtë marrëveshje, UEFA synon të sigurojë qëndrueshmërinë e saj ekonomike për të ardhmen pa frikë se çfarë mund t’u ofrojë klubeve një Superligë e mundshme. Spanjollët shtojnë se Ceferin përfundimisht iu dorëzua petrodollarëve nga frika e krijimit të një Superlige të re, për të cilën po angazhohet edhe presidenti i Realit Madridit, Florentino Perez./Katror.info
Përgatiti:
