Qytetarët e Kosovës nga sot kanë filluar të lëvizin pa viza në vendet e Zonës Shengen. Por, për ta ruajtur këtë të drejtë të fituar pas disa vitesh, duhet respektuar rregullat e përcaktuara nga Bashkimi Evropian. Një thirrje të tillë e bëri sot edhe zëvendëskryeministri i Kosovës, Besnik Bislimi, përmes një postimi në Facebook.
Ai tha se 1 janari i vitit 2024 ka shënuar fillimin e proceseve të rëndësishme për vendin duke përmendur liberalizimin e vizave, lëvizjen e lirë të qytetarëve me targa “RKS” në Serbi dhe fillimin e pagesës së energjisë elektrike në katër komunat veriore.
“Lëvizja e lirë pa viza filloi e qytetarët kanë nisur të përfitojnë nga kjo e drejtë e fituar me mund. Me rëndësi është të rikujtojmë se ajo duhet të shfrytëzohet pozitivisht, e jo të keqpërdoret. Ka rregulla brenda lirisë për të udhëtuar të cilat duhen respektuar e trajtuar me përgjegjësi”, ka shkruar ai mes tjerash.
Më poshtë postimi i plotë:
“1 janari 2024 shënoi fillimin e proceseve të rëndësishme për vendin tonë, e për më tepër procese të cilat po ndodhin për herë të parë.Lëvizja e lirë pa viza filloi e qytetarët kanë nisur të përfitojnë nga kjo e drejtë e fituar me mund. Me rëndësi është të rikujtojmë se ajo duhet të shfrytëzohet pozitivisht, e jo të keqpërdoret. Ka rregulla brenda lirisë për të udhëtuar të cilat duhen respektuar e trajtuar me përgjegjësi.”
“Nga sot, qytetarët tanë do të mund të lëvizin tashmë të padiskriminuar nga autoritetet serbe, me targat tona zyrtare RKS dhe pa vendosur ngjitëset në simbolet shtetërore në targat e veturave. Ky ishte pozicioni ynë që nga fillimi e kjo u realizua pas 2 vitesh tensione të panevojshme. Gjithashtu, Elektrosever ka filluar nominimin e energjisë që konsumohet në katër komunat në veri, që nënkupton se nga sot pushojnë edhe devijimet e KOSTT-it. Pas më shumë se 20 vitesh, edhe në veriun e vendit tonë, do paguhet rryma njëjtë si në të gjithë territorin e Republikës së Kosovës. 3 procese kanë filluar nga sot, procese të tjera do t’i ndërmarrim e zhvillojmë përgjatë vitit, gjithmonë në shërbim të interesave të të gjithë qytetarëve tanë.”/Katror.info
Përgatiti:
