Aeroporti Ndërkombëtar i Pittsburgh-ut (PIT) po dyfishon kapacitetin e paneleve diellore duke shfrytëzuar një pronë ngjitur që dikur shërbente si deponi mbeturinash, shkruan GoodNewsNetwork, përcjell Katror.info.
Sipërfaqja prej 12 hektarësh tashmë e rehabilituar do të mbulohet me panele që do të gjenerojnë 4.7 megavat energji të pastër, duke shmangur rreth 5 milionë paund emetime të dioksidit të karbonit që përndryshe do të prodhoheshin nga lëndët djegëse fosile.
PIT tashmë operon një mikro-rrjet të vetin me 23 megavat, që përfshin energji diellore dhe gaz natyror. Ky sistem siguron energjinë për aeroportin, përdor gazin gjatë orëve të pikut ose kur nuk ka diell dhe transferon tepricën e energjisë diellore në shtëpitë dhe bizneset lokale.
Mundesh me e lexu edhe…
Fermës së re diellore, që do të ndërtohet mbi deponinë e dikurshme, pritet t’i shtohet edhe një mini-rafineri për prodhimin e karburantit të qëndrueshëm për avionë, sipas Elektrek. Ajo pritet të jetë funksionale në vitin 2027.
“Jemi duke e shfrytëzuar çdo aset të aeroportit për të mirën e rajonit – nga fluturimet te zhvillimi i pronës dhe inovacioni në energji,” tha Christina Cassotis, drejtoreshë ekzekutive e PIT. “Dhe kjo është vetëm fillimi.”
Përveç kursimeve të mëdha – rreth 1 milion dollarë në vit për energjinë elektrike – ky sistem ka provuar vlerën e tij në raste si ndërprerjet e energjisë që paralizuan aeroportet në Londër, Spanjë dhe Portugali, duke e mbrojtur PIT nga fatkeqësi të tilla./Katror.info
