Universiteti i Prishtinës ka zgjatur afatin për aplikim në studimet master për vitin akademik 2025/’26, duke u dhënë më shumë kohë të gjithë kandidatëve të interesuar që të bëhen pjesë e këtij niveli të rëndësishëm akademik. Aplikimi do të qëndrojë i hapur deri më 12 korrik 2025, në orën 16:00, shkruan Katror.info.
E veçanta e këtij konkursi është se të drejtë aplikimi kanë edhe studentët që i kanë përfunduar të gjitha provimet e programit baçelor, por që ende nuk e kanë mbrojtur temën apo dhënë provimin e diplomës – me kusht që diplomimi të ndodhë para datës 2 shtator 2025.
Universiteti i Prishtinës ofron një gamë të gjerë programesh master në fusha të ndryshme të studimit, të ndërtuara për t’iu përgjigjur nevojave të tregut të punës dhe për të nxitur zhvillimin profesional dhe personal të studentëve. UP-ja synon të jetë jo vetëm një institucion i arsimit të lartë, por një hapësirë e rritjes intelektuale, bashkëpunimit dhe inovacionit./Katror.info
