Agjencia e Kosovës për Akreditim (AKA) ka hapur zyrtarisht platformën për aplikim për akreditim institucional dhe të programeve studimore, si dhe për deklarimin e stafit akademik për vitin akademik 2025/2026, shkruan Katror.info.
Afati për aplikim është i hapur deri më 31 korrik 2025, në përputhje me afatet e përcaktuara ligjore. Institucionet e arsimit të lartë (IAL) ftohen të përfshijnë deklarimin e stafit për të gjitha programet e akredituara dhe të aplikojnë për akreditim, riakreditim dhe validim të programeve për ciklin e ardhshëm akademik.
Deklarimi i stafit duhet të jetë në përputhje me kriteret ligjore dhe me rregulloren e AKA-së, ndërsa vetë procesi zhvillohet përmes platformës së digjitalizuar E-akreditimi, e cila garanton një aplikim më të shpejtë, më të sigurt dhe më efikas.
Mundesh me e lexu edhe...
Përmes kësaj platforme, verifikimi i dokumentacionit dhe i marrëdhënieve të punës së stafit akademik bëhet automatikisht, në bashkëpunim me institucione shtetërore si Agjencia e Regjistrit Civil (ARC) dhe Administrata Tatimore e Kosovës (ATK), duke rritur transparencën dhe efikasitetin e procesit.
AKA ka njoftuar se do të ofrojë asistencë teknike të vazhdueshme për institucionet që aplikojnë, duke i mbështetur ato gjatë gjithë afatit përmes ekipeve të saj profesionale. Çdo institucion që përballet me vështirësi gjatë përdorimit të platformës mund të kontaktojë AKA-në për ndihmë dhe sqarime shtesë./Katror.info
