Aktivistët e grupit “Asnji cent ma shumë” kanë zhvilluar një aksion simbolik sot në mëngjes, duke bllokuar hyrjen e Zyrës së Rregullatorit për Energji (ZRRE). Ky veprim u organizua në shenjë pakënaqësie ndaj paralajmërimit se tarifat e energjisë elektrike mund të rriten për 15%, shkruan Katror.info.
Aktivistët janë zotuar se do ta mbajnë bllokimin deri sa ZRRE të deklarohet publikisht se nuk do ta miratojë rritjen e tarifave. “Vetëm atëherë mund të kthehen punës”, thuhet në njoftimin e tyre.
Gjatë protestës, disa prej aktivistëve janë arrestuar nga policia për shkak se nuk lejuan punonjësit e institucionit të hyjnë në zyrat e tyre. Protestuesit kërkonin që ZRRE të merrte vendim për mos rritjen e tarifave para se të mundësohej puna normale e institucionit.
Mundesh me e lexu edhe…
Nga ana tjetër, kryetari i Bordit të ZRRE-së, Ymer Fejzullahu, ka mohuar se tashmë është marrë një vendim për rritjen e tarifave, duke deklaruar se aktualisht mbeten në fuqi tarifat ekzistuese. Ai ka sqaruar se vendimi për rritjen e mundshme do të merret më 11 prill.
Protesta e sotme vjen pas shqetësimeve të qytetarëve se rritja e tarifave do të përkeqësonte situatën ekonomike të familjeve dhe bizneseve, në një kohë kur kostoja e jetesës është rritur ndjeshëm.
Situata mbetet e tensionuar, ndërsa pritet që institucionet kompetente të dalin me qëndrime zyrtare për zgjidhjen e kësaj çështjeje./Katror.info
Përgatiti:
