Ambasada e Shteteve të Bashkuara në Kosovë ka ftuar kompanitë kosovare të marrin pjesë në një nga ngjarjet më prestigjioze për investime ekonomike në botë – Samitin e Investimeve “SelectUSA”, i cili do të mbahet nga 11 deri më 14 maj 2025 në National Harbor, Maryland, shkruan Katror.info.
“Kompanitë nga Kosova që janë të gatshme të eksplorojnë tregun amerikan janë të inkurajuara të marrin pjesë në këtë samit të veçantë,” thuhet në njoftimin e ambasadës, duke theksuar se pjesëmarrësit do të kenë mundësi të çmuara për të zhvilluar rrjete të reja dhe për të përfituar nga programet mbështetëse që ofrohen për investime në SHBA.
Në reagimin e saj zyrtar, ambasada thekson se ky samit i nivelit të lartë ofron një platformë unike për ndërmarrjet dhe sipërmarrësit nga mbarë bota, për të ndërtuar partneritete, për të identifikuar mundësi rritjeje dhe për të krijuar lidhje të drejtpërdrejta me organizata zhvillimore ekonomike dhe përfaqësues nga më shumë se 50 shtete amerikane dhe territore të tjera.
“SelectUSA Investment Summit” shërben si urë lidhëse mes kompanive ndërkombëtare dhe tregut amerikan, duke ofruar qasje në burime të rëndësishme, ekspertizë sektoriale dhe informacion praktik për investime të suksesshme në SHBA. Në agjendë përfshihen seanca plenare, diskutime panel, prezantime, sesione akademike dhe një ekspozitë me qindra organizata zhvillimore ekonomike dhe ofrues të shërbimeve të biznesit.
Samiti i vitit 2025 pritet të mbledhë mijëra investitorë, biznese, zyrtarë qeveritarë dhe liderë ekonomikë nga më shumë se 90 tregje të ndryshme të botës, përfshirë edhe Kosovën. Pjesëmarrja në këtë ngjarje shihet si një mundësi e rrallë për promovimin dhe zgjerimin e kapaciteteve të bizneseve kosovare në një prej tregjeve më të mëdha dhe më konkurruese në botë./Katror.info
Përgatiti:
