Ambasada e Republikës së Kosovës në Gjermani ka njoftuar organizimin e Javës së Kulturës së Kosovës në Berlin, një ngjarje e rëndësishme që zhvillohet tradicionalisht në kuadër të shënimit të Ditës së Çlirimit të Kosovës, më 12 qershor, shkruan Katror.info.
Kjo datë përfaqëson një moment domethënës në historinë e shtetësisë së Kosovës dhe shërben si një pikë referimi për rrugëtimin e saj drejt lirisë dhe pavarësisë.
Ngjarja do të zhvillohet përgjatë nëntë ditëve dhe do të sjellë në zemër të Berlinit një program të larmishëm me përmbajtje kulturore dhe artistike.
Mundesh me e lexu edhe…
Aktivitetet përfshijnë koncerte, shfaqje filmike, ekspozita, prezantime letrare, ngjarje sportive si dhe diskutime me artistë, regjisorë, sportistë dhe përfaqësues të komunitetit shqiptar në Gjermani. Qëllimi i kësaj jave është promovimi i trashëgimisë kulturore të Kosovës dhe krijimi i një hapësire të përbashkët për shkëmbim dhe bashkëpunim kulturor.
Në kuadër të programit, më 14 qershor 2025, në orën 19:00, në Colosseum Filmtheater Berlin (Gleimstraße 31, 10437), do të organizohet një mbrëmje filmike me pjesëmarrjen e disa prej regjisorëve më të njohur të kinematografisë kosovare. Në këtë mbrëmje do të shfaqen filmat “I Believe the Portrait Saved Me” nga Alban Muja, “Return” nga Blerta Zeqiri, “Ferdonija” nga Gazmend Bajri dhe Shkurte Dauti, si dhe “Displaced” nga Samir Karahoda.
Ambasada thekson se Java e Kulturës nuk është thjesht një seri aktivitetesh, por një platformë për të ndarë historitë dhe identitetin kulturor të Kosovës me publikun ndërkombëtar. Ngjarja synon të krijojë ura komunikimi dhe mirëkuptimi mes Kosovës dhe miqve të saj në Gjermani dhe më gjerë./Katror.info
