Ambasada e Italisë në Kosovë, në një postim në Facebook, është deklaruar për takimin që ambasadorët e shteteve të QUINT’it kanë zhvilluar me kryeministrin në detyrë, Albin Kurti.
Ambasada ka thënë se është theksuar nevoja për formimin sa më të shpejtë të qeverisë së re.
“Sot ambasadorët e QUINT-it janë takuar me kryeministrin në detyrë Kurti. Është theksuar nevoja për të formuar sa më shpejt një qeveri të re, që Kosova të ecën para drejt prioriteteve kyç si avancimi drejt integrimit Euro-Atlantik”, thuhet në njoftimin e ambasadës së Italisë.
Mundesh me e lexu edhe…
Njësoj është shprehur edhe ambasadori i Mbretërisë së Bashkuar në postimin e tij në Facebook.
”Pasditen e sotme u takova me Kryeministrin në detyrë Kurti dhe ambasadorët tjerë të QUINT-it. Inkurajova formimin sa më të shpejtë të një qeverie të re, që të veprojë në interes të Kosovës dhe qytetarëve të saj duke bërë përparim në çështje të rëndësishme, si zhbllokimi i fondeve dhe avancimi drejt integrimeve euroatlantike”, ka shkruar Hargreaves.
Ndërsa sipas njoftimit të Qeverisë, kryeministri në detyrë i Republikës së Kosovës, Albin Kurti, së bashku me zëvendëskryeministrin Besnik Bislimi dhe zëvendësministrin e Punëve të Jashtme, Kreshnik Ahmeti, priti sot ambasadorët e shteteve të QUINT-it dhe Shefin e Zyrës së BE-së në Kosovë.
Temë qendrore e takimit ishte procesi i anëtarësimit të Kosovës në Këshillin e Evropës. Kryeministri rikujtoi se Kosova i ka përmbushur kriteret ligjore dhe institucionale dhe se pranimi i vendit tonë do të dëshmonte vlerësimin e reformave demokratike dhe përkushtimit ndaj vlerave evropiane. Ai theksoi se vonesat po ua mohojnë qytetarëve, përfshirë komuniteteve joshumicë, të drejtën për qasje në Gjykatën Evropiane të të Drejtave të Njeriut.
Në takim u diskutua edhe për procesin e integrimit në Bashkimin Evropian dhe zhvillimet e fundit në vend.
Kujtojmë se koalicioni Lëvizja Vetëvendosje, Guxo dhe Alternativa deri më tash nuk ka mundur t’i sigurojë votat e mjaftueshme për të zgjedhur kreun e Kuvendit të Kosovës. Propozimi i Albulena Haxhiut për kryeparlamentare mbetet i papranueshëm për partitë e tjera (Partinë Demokratike të Kosovës, Lidhjen Demokratike të Kosovës dhe Aleancën për Ardhmërinë e Kosovës./Katror.info
Përgatiti:
