Ambasadori i Finlandës në Prishtinë, Matti Nissinen, në një intervistë për platformën “The Geopost” në përfundim të mandatit të tij trevjeçar, ka vlerësuar se Kosova është në rrugën e duhur drejt anëtarësimit në familjen e madhe euroatlantike.
“Unë besoj se Kosova është në rrugën e duhur drejt organizatave evropiane dhe euroatlantike. Dhe mesazhi im është që të vazhdohet në këtë rrugë, fokusi të jetë tek reformat shoqërore, dhe sa më shpejt të jetë e mundur, të shohim Kosovën si anëtare të organizatave të ndryshme ndërkombëtare”, ka theksuar mes tjerash Nissinen.
Ai ka inkurajuar qeverinë të investojë më shumë në njerëz, arsim, shëndetësi dhe në krijimin e vendeve të punës për kosovarët. Ky model, sipas tij, ka funksionuar në Finlandë dhe nuk ka asnjë arsye të dyshojë se nuk do të funksionojë edhe në Kosovë.
Mundesh me e lexu edhe…
Ndryshe, raportet mes Kosovës dhe Finlandës janë trashëguar nga ish-presidenti finlandez, Martti Ahtisaari, i cili mori pjesë në ndërmjetësimin e procesit të paqes në Kosovë në vitin 1999, si dhe shërbeu si i dërguar special i Kombeve të Bashkuara për statusin e saj në vitet 2005-2008, duke luajtur një rol kyç në pavarësinë e Kosovës./Metro/Katror.info
