Me një përzgjedhje të pasur prej 162 filmash nga 51 shtete, Festivali Ndërkombëtar i Filmit të Animuar “Anibar” rikthehet këtë verë me edicionin e tij të 16-të, që do të mbahet nga 14 deri më 20 korrik në qytetin e Pejës, shkruan Katror.info.
Edicioni i sivjetmë kthen vëmendjen drejt thelbit të animacionit si një formë arti që flet për njeriun, për botën dhe për kohën në të cilën jetojmë. Sipas organizatorëve, përmes një programi të kuruar nga Petrit Gora, Vita Kasapolli dhe Panot Mahmutaj, ky edicion sjell një rrugëtim filmik të pasur, të shumëllojshëm dhe gjithnjë aktual.
Festivali ka pranuar këtë vit gjithsej 1504 aplikime nga 111 vende të botës, prej të cilave janë përzgjedhur filmat që do të konkurrojnë në gjashtë gara kryesore dhe tri kategori. Programi garues përfshin filma nga gara ndërkombëtare, studentore, ballkanike, të videove muzikore të animuara, për audiencën e re dhe për të drejtat e njeriut.
Mundesh me e lexu edhe...
Përveç filmave, Anibar do të ofrojë edhe aktivitete shtesë që përfshijnë panele diskutimi, punëtori dhe ngjarje kulturore që e bëjnë këtë festival një pikëtakim të rëndësishëm për artin, aktivizmin dhe dialogun ndërkombëtar përmes animacionit./Katror.info
