Nga 15 deri më 20 korrik, Parku i Qytetit në Pejë do të shndërrohet në një hapësirë të gjelbër dhe krijuese falë iniciativës Eco-Nest, pjesë e edicionit të 16-të të Festivalit Ndërkombëtar të Animacionit Anibar, shkruan Katror.info.
Eco-Nest është një platformë që ndërthur artin me vetëdijen mjedisore, duke ofruar mundësi për të ndarë ide, për të ekspozuar punime artizanale dhe për të mësuar teknika të ndryshme të ripërdorimit. Nga punimet me baltë dhe ngjyrosja natyrale, deri te rrobat e ricikluara dhe DIY, kjo fole kreative synon të frymëzojë pjesëmarrësit për të jetuar dhe krijuar në harmoni me natyrën.
Çdo ditë nga ora 17:00 deri në 22:00, vizitorët do të kenë mundësi të përfshihen në aktivitete praktike dhe të njihen me artistë e aktivistë që promovojnë qëndrueshmërinë përmes veprave dhe veprimeve.
Mundesh me e lexu edhe…
Të interesuarit për të qenë pjesë e Eco-Nest mund të aplikojnë përmes këtij linku.
Ky projekt është realizuar në partneritet me BPB Bank dhe është mbështetur nga Bashkimi Evropian në Kosovë. Përmbajtja është përgjegjësi e vetme e Anibar dhe nuk pasqyron domosdoshmërisht qëndrimet e BE-së./Katror.info
