Agjencia për Ndihmë Juridike Falas (ANJF) ka nënshkruar një marrëveshje partneriteti me organizatën Advocacy Training and Resource Center (ATRC), me qëllim të zgjerimit të qasjes në drejtësi për qytetarët e Kosovës përmes ofrimit të ndihmës juridike falas.
Marrëveshja u nënshkrua nga Faton Jashari, ushtrues detyre i ANJF-së, dhe Kushtrim Kaloshi, drejtor i ATRC-së. Sipas njoftimit zyrtar, kjo marrëveshje parasheh ofrimin e ndihmës juridike falas për qytetarët që plotësojnë kriteret ligjore, me theks të veçantë tek gratë, të rinjtë, komunitetet jo-shumicë dhe personat në kushte të pafavorshme socio-ekonomike.
Shërbimet do të ofrohen nga zyra e ATRC në Prishtinë, por do të jenë të qasshme në të gjithë territorin e Republikës së Kosovës.
Mundesh me e lexu edhe…
ANJF ka theksuar se kjo marrëveshje është pjesë e zbatimit të Rregullores për Përcaktimin e Kritereve për Ofrimin e Ndihmës Juridike Falas nga Organizatat Joqeveritare në Partneritet me Agjencinë, në kuadër të transformimit të sistemit të ndihmës juridike falas në vend.
“Partneriteti me organizatat joqeveritare sjell një dimension të ri në misionin e Agjencisë për të siguruar qasje të barabartë në drejtësi për të gjithë. Nëpërmjet bashkëpunimit dhe koordinimit të përbashkët, jemi të përkushtuar të ofrojmë shërbime juridike profesionale, efikase dhe efektive për qytetarët tanë,” thuhet në njoftim./Katror.info
