Episodi i katërt i dokumentarit “4 Çerekët” rikthen në skenë kujtime dhe momente kyçe nga rruga e basketbollit të Kosovës. Në këtë pjesë, ish-basketbollisti dhe gazetari sportiv Blerim Vuniqi tregon se si pasioni për lojën nisi si hobi, u shndërrua në profesion dhe më pas në stil jete.
“Kam nisur kur nuk ka pasur as trepikësh, as semaforë, as kosh me faul. Kam luajtur në ligat e një shteti që sot nuk ekziston dhe në ligat e një shteti që po e themelonim vetë, pa e ditur se kur ajo ëndërr do të bëhej realitet. Kam luajtur në beton, në sallat e sporteve e palestrat e shkollave fillore. Kam transmetuar Ligën e Kosovës nga sallat e ftohta me telefon statik për radio. Kam transmetuar NBA-n dhe Lojërat Olimpike,” – rrëfen Vuniqi.
Në këtë episod rrëfen edhe Arben Fetahu, duke kujtuar një nga momentet më të ndjeshme të historisë së basketbollit kosovar: pasigurinë për përfshirjen e disa lojtarëve në ndeshjen e parë ndërkombëtare.
Mundesh me e lexu edhe…
“Po ndoshta kjo është me rëndësi për të mbetur diku në analet e historisë: deri në 15 minuta para fillimit të ndeshjes së parë nuk e kemi ditur nëse e kemi lejen prej FIBA-s për të luajtur me dy prej lojtarëve tanë të asaj kohe, sepse ende nuk i kishin kaluar kriteret e pranueshmërisë.
Ata lojtarë kanë qenë Edmond Azemi dhe Xharrin Sina – në fakt, kanë qenë tre, sepse edhe Yll Kaqaniku ishte në atë situatë. Ylli kishte qenë pjesë e përfaqësueses së Turqisë, Edo Azemi i Shqipërisë, ndërsa me pasaportë kroate, por duke qenë se nëna e tij ishte nga Bosnja, ai kishte të drejtë të pajisej edhe me pasaportë boshnjake.
Prandaj, ishte e nevojshme të merreshin leje nga të gjitha këto shtete dhe vetëm në fund FIBA dha vërtetimin përfundimtar,” – kujton Fetahu.
Dokumentari “4 Çerekët”, i autorit dhe producentit Leart Hoxha, me intervista të realizuara nga Blerim Vuniqi, është prodhim i Katror Media dhe mbështetet nga Ministria e Kulturës, Rinisë dhe Sportit.
Episodin e katërt mund ta ndiqni këtu:
