Pesë individë të breshkës së kuqe me veshë të kuqe (Trachemys scripta elegans), një specie invazive me origjinë nga Amerika e Veriut, janë vërejtur në Liqenin e Badovcit. Lajmin e bëri të ditur fotografi i botës së egër, Arian Mavriqi, i cili dokumentoi praninë e tyre gjatë një vizite në këtë liqen, shkruan Katror.info.
“Kjo lloj breshkë (Trachemys scripta elegans) që e kam fotografuar në Liqenin e Badovcit tek ne është invazive, se si erdhi deri këtu nuk kemi as idenë më të vogël. Ishin diku 5 të tilla me aq sa i vërejta. Habitati i saj natyror është në Amerikën e Veriut”, njoftoi Mavriqi në postimin e tij.
Trachemys scripta elegans është një lloj breshke semi-uji që zakonisht gjendet në jug të Shteteve të Bashkuara dhe në pjesë të Meksikës veriore. Ajo ka fituar popullaritet si kafshë shtëpiake dhe shpesh lëshohet në natyrë nga pronarët e saj, duke u bërë një nga speciet invazive më të përhapura në botë. Në Bashkimin Evropian, kjo specie është listuar si invazive që nga viti 2016, me ndalim për import, shitje dhe lirim në natyrë.
Mundesh me e lexu edhe…
Ekspertët paralajmërojnë se prania e breshkave invazive mund të ndikojë në ekosistemet lokale, duke konkurruar me speciet vendase për ushqim dhe habitat. Autoritetet dhe organizatat mjedisore nxisin qytetarët të raportojnë çdo vëzhgim të këtij lloji dhe të mos i lëshojnë kafshët shtëpiake në natyrë./Katror.info
Fotografitë e Maviqit shërbejnë si një thirrje për ndërgjegjësim mbi ruajtjen e biodiversitetit dhe mbrojtjen e liqeneve dhe lumenjve të Kosovës./Katror.info
