Arti në ndihmë të fëmijëve ‘Bashkohu – Shpëto Jetë’ në Prishtinë

Koncertet humanitare janë një formë e fuqishme e aktivizmit qytetar, ku arti dhe ndjeshmëria ndaj të tjerëve bashkohen për të sjellë ndryshim.

Një shembull i shkëlqyeshëm është koncerti filantropik “Bashkohu, Shpëto Jetë”, i organizuar nga “Action for Health”. Ky event ka mbledhur artistë të njohur nga Kosova, aktivistë dhe qytetarë të përkushtuar për të ndihmuar fëmijët që luftojnë me kancer.

Aktiviteti, i zhvilluar në kuadër të Muajit të Ndërgjegjësimit për Kancerin në Fëmijëri, ka transformuar Sallën Atelie të Filharmonisë së Kosovës në Pallatin e Rinisë në Prishtinë në një mbrëmje të veçantë, të mbushur me muzikë, emocion dhe solidaritet.

Organizatorja e koncertit, Nezaqete Rukovci, ka theksuar rëndësinë e solidaritetit në këto ngjarje, duke shprehur se ky lloj aktivizmi është një akt i madh zemërgjerësie dhe ndjeshmërie që buron nga përvoja e saj si gazetare.

“Kauzat humanitare dhe ndjeshmërinë me njerëzit i kam edhe si gazetare, vazhdimisht si gazetare që ka përcjellë shëndetësinë dhe politikën sociale kam marrë pjesë në aksione të ndryshme për eliminimin e ndonjë sëmundje, për shënimin e ditëve karakteristike, që janë dediku sëmundjeve të ndryshme, qoftë paralizës së fëmijëve, personave me aftësi të kufizuara”, shprehet ajo.

Një vizitë në Klinikën e Pediatrisë e shtyu Nezaqeten, që të ndërmarrë aksionin për ndihmë fëmijëve.

Ajo thotë se për shumë ndryshime në shoqëri nuk duhet të pritet nga institucionet. Shoqëria aktive e ka një rol të rëndësishëm në arritjen e ndryshimeve pozitive.

‘’Sigurisht që shoqëria civile e ka vendin e vet, e ka pjesën e vet, kryesoren atë për vetëdijësim dhe qytetarët po i përgjigjen ftesës për tu bashku në kauzë dhe jemi të kënaqur me përgjigjen, çdo herë që organizojmë, vijnë qytetarë bashkohen dhe i përgjigjen kauzës tonë për të ndihmuar fëmijët edhe familjet”, vlerëson Nezaqetja.

Artistët që morën pjesë në këtë koncert sopranoja e mirënjohur Krenare Gashi, e shoqëruar nga Andi Duraku në piano dhe Donjeta Cërmjani në violonçelë, u shprehën se performanca në një koncert të tillë nuk është vetëm një shfaqje artistike, por një akt i pastër humanizmi, një kontribut për një kauzë që prek zemrat e të gjithëve. 

‘’Sot u ndjeva shumë e lumtur që isha pjesë e koncertit humanitar Action for Health edhe krejt ky muaji shtator është për ndërgjegjësimin për kancer të fëmijëve, e fëmijët janë qenia më e rëndësishme për ne. Është diçka e papërshkrueshme që duhet të bëjmë të gjithën që të mund t’ju ndihmojmë edhe atyre familjeve që ju duhet një përkrahje e madhe në ato rrethana, e bash jam shumë e lumtur që mujta me dhanë edhe unë kontributin tim”, thotë Krenarja.

“Kur arti është në shpirt, nuk ka nevojë për materializim,” tha Krenarja duke nënvizuar se pjesëmarrja e tyre në koncertin bamirës nuk ka të bëjë me famën apo përfitimet financiare, por me dëshirën për të ndihmuar dhe për të përdorur talentin e tyre për të sjellë një ndikim pozitiv në shoqëri. 

‘’Ne të muzikës klasike, më duket edhe ashtu, nuk është që i materializojmë koncertet më shumë është për artdashësit që e bëjnë këtë punë dhe për ndjeshmërinë që e kemi për artin dhe kulturën, muzikën, kështu që normal jemi gjithmonë të hapur për koncerte bamirësie, dhe patjetër kjo është shumë e mirë dhe me rëndësi”, shprehet ajo.

Ndërsa pianisti Andi Duraku tha se është një ndjenjë dhe emocion krejt tjetër të performosh në një koncert bamirësie.

“Është me të vërtetë ndjenjë e veçantë dhe emocione komplet të ndryshme me koncertet e tjera, të cilat i kam mbajtur duke marrë parasysh kauza dhe gjithçka rreth organizimit, mënyra e organizimit, bashkëpunimi me kolegët e mia të mrekullueshme, Krenaren dhe Donjetën. Ishte me të vërtetë një përvojë dhe kjo javë me të vërtetë ishte një emocion ndryshe nga secili emocion që kam përjetuar më herët”, thotë ai.

Sipas tij artistët kanë një rol kyç në rritjen e kauzave të tilla me përkrahje si me prezencë ashtu edhe me forma tjera.

‘’Nuk është hera e parë që unë marr pjesë në një ngjarje të tillë, pasi edhe herë tjera kam bashkëpunuar pikërisht me Action for Health me një datë tjetër të rëndësishme, si dhe kam qenë pjesë e aktiviteteve, vizitave të Klinikës së Pediatrisë së Fëmijëve dhe gjithçka tjetër. Unë mendoj që roli i artistit është shumë i rëndësishëm, andaj nëse e ndajmë një kohë për kauza të tilla është me të vërtetë një përkrahje shumë e madhe ndaj këtyre njerëzve, të cilët me të vërtetë po mundohen kaq shumë”, thotë Andi.

Secili nga pjesëmarrësit kontribuoi me një shumë të pacaktuar, ndërsa eventi u realizua falë donatorëve dhe vullnetarëve të tjerë të cilët kontribuan si në nevojat e koncertit ashtu edhe në mbarëvajtjen e tij. /Katror.info

Edicionin #61 të plotë e gjeni këtu! 🙂