A është arti thjesht shprehje estetike, apo mund të përdoret për adresim të çështjeve sociale? Cilat janë disa nga modelet funksionale për bashkëpunime mes artistëve dhe institucioneve kulturore? Si mund të jemi më gjithëpërfshirës në punën tonë artistike dhe si mund t’u afrohemi komuniteteve përmes punës artistike? Çfarë roli luan ndjeshmëria gjinore që arti ynë të bëhet më gjithëpërfshirës?
Këto janë vetëm disa nga pyetjet që marrin përgjigje në Paketën e Mjeteve për Promovimin e Përdorimit të Artit dhe Kulturës në Nismat Lokale, publikuar nga OJQ-të lokale Integra dhe CASA me mbështetjen e BE-së. Duke theksuar rolin transformues të artit, Paketa e Mjeteve që u promovua në Qendrën BARABAR në Prishtinë këtë shtator, i pajis organizatat e shoqërisë civile dhe artistët individualë me mjetet për adresim të sfidave sociale dhe për lehtësim të dialogut ndërmjet komuniteteve. E përshtatur për kontekstin unik të Kosovës, kjo paketë siguron që qasjet e saj të jenë relevante dhe me ndikim për ata që synojnë të sjellin ndryshim kuptimplotë dhe të qëndrueshëm.
Integra dhe CASA janë partnerët menaxhues të nismës Projekti BIG – Iniciativa e Barabar (shkon) në komunitet, të financuar nga BE-ja. Projekti BIG është nismë inovative që synon të mbështesë organizata me bazë në komunitet, gra aktiviste kulturore dhe artistë e artiste në mbarë Kosovën për shfrytëzimin e artit dhe kulturës si mjete për promovimin e përfshirjes sociale, kohezionit të komuniteteve dhe pjesëmarrjes demokratike. Projekti ka në fokus forcimin e akterëve lokalë, krijimin e një platforme për bashkëpunim dhe adresimin e sfidave kyçe sociale duke nxitur avokimin për politika dhe aktivizmin kulturor nga themelet.
Mundesh me e lexu edhe...
Një nga komponentët kyçë të projektit është Rrjeti Barabar në Komunitet (BGN), një platformë që u mundëson organizatave me bazë në komunitetet, artisteve gra, profesionistëve/eve kulturorë/e lokalë/e dhe artistëve/e të bashkëpunojnë, të shkëmbejnë ide dhe të përforcojnë ndikimin e tyre.
Thirrjes së hapur për aplikime për t’iu bashkuar rrjetit i parapriu hartëzimi i plotë i artisteve dhe OSHC-ve në Kosovë, duke rezultuar më pas në përzgjedhjen e një spektri të larmishëm të artisteve/aktivisteve individuale, të njohura edhe si artiviste, nga njëra anë, dhe OSHC-ve lokale që përfaqësojnë komunitete të ndryshme që jetojnë në Kosovë nga ana tjetër. Këto OSHC ose kanë përvojë në përdorimin e arteve si një mjet për ndryshime sociale ose aspirojnë të integrojnë artin në punën e tyre të përditshme me komunitetet e tyre.
Rrjeti Barabar në Komunitet (BGN) tanimë përfaqëson 25 anëtarë, duke përfshirë 10 artiste individuale dhe 15 OSHC me bazë në komunitet. Përmes anëtarësimit të tyre në Rrjetin Barabar në Komunitet (BGN), anëtarët/et kualifikohen për aplikim për thirrjen për mbështetje të nismave të tyre lokale duke përdorur artin për adresimin e çështjeve sociale që lidhen me komunitetet e tyre. Thirrja do të vijë si hap vijues pasi që anëtarët të kenë përfunduar tri sesione trajnimi për ndërtimin e kapaciteteve, të dizajnuara për forcimin e aftësive të tyre për shfrytëzimin e mjeteve dhe teknikave të aktivizmit artistik dhe kulturor për nxitjen e ndryshimeve pozitive sociale dhe për promovimin e integrimit social gjithëpërfshirës. Këto sesione synojnë gjithashtu të përmirësojnë shkathtësitë për dizajnim të strategjive dhe modeleve të punës gjithëpërfshirëse, si dhe për mbledhjen e fondeve dhe menaxhimin e projekteve.
I pari prej tri sesioneve të trajnimit u zhvillua muajin e kaluar në Brezovicë, nën titullin Shfrytëzimi i Mjeteve dhe Teknikave të Artit dhe Aktivizmit Kulturor për Nxitjen e Integrimit Social Gjithëpërfshirës, ku pjesëemarrësit eksploruan mënyrat si mundet arti të shërbejë si katalizator për ndryshime sociale.
Idetë për projekte që rezultuan, nga slam poezia në kulla tradicionale te skulpturat interaktive dhe punëtoritë për terapi arti, demonstruan si munden partneritetet mes artistëve dhe OSHC-ve të bashkojnë kreativitetin me fuqizimin e komunitetit për të nxitur përfshirjen dhe transformimin social.
Falë financimit të BE-së, komunitetet në mbarë Kosovën do të përfitojnë nga nismat e përqendruara në format të shprehjes artistike që adresojnë problemet dhe nevojat e tyre. Bazuar në logjikën e qarkut të plotë, Projekti BIG do të krijojë ndikim afatgjatë – si tek artistët dhe OSHC-të e përfshira, përmes ndërtimit të kapaciteteve dhe mbështetjes së drejtpërdrejtë, ashtu edhe tek komunitetet me dhe për të cilat do të zbatohen këto nisma.
Marrë nga Europe House Kosova
