Mjekët zviceranë po zgjerojnë mundësitë e trajtimit për pacientët me probleme të shëndetit mendor dhe sëmundje kronike, duke rekomanduar shëtitje në kopshte publike, vizita në galeri arti dhe muze.
Qyteti i Neuchatel, në perëndim të Zvicrës, nisi një projekt pilot me mjekët muajin e kaluar për të ndihmuar banorët që kanë vështirësi dhe për të promovuar aktivitetin fizik, shkruan Reuters, transmeton Katror.info.
“Për njerëzit që ndonjëherë kanë vështirësi me shëndetin e tyre mendor, ky program u mundëson atyre që për një moment të harrojnë shqetësimet, dhimbjet dhe sëmundjet e tyre dhe të kalojnë një moment të këndshëm zbulimi,” tha Patricia Lehmann, një mjeke nga Neuchatel që merr pjesë në program, për Reuters.
Mundesh me e lexu edhe…
“Jam e bindur se kur kujdesemi për emocionet e njerëzve, lejojmë ata që ndoshta të gjejnë një rrugë për shërim”, tha ajo.
Pesëqind bileta do të shpërndahen për vizita falas në katër vende, përfshirë tre muze dhe kopshtin botanik të qytetit.
Një prej këtyre biletave iu dha një gruaje 26-vjeçare që po kalon një periudhë të vështirë nga lodhja e tepërt dhe që Reuters e takoi në Muzeun e Artit dhe Historisë të Neuchatel, ku ndodhen vepra nga Claude Monet dhe Edgar Degas, si dhe një koleksion kukullash automatike.
Autoritetet thonë se ideja erdhi nga një studim i Organizatës Botërore të Shëndetësisë të vitit 2019, që hulumtonte rolin e artit në promovimin e shëndetit dhe trajtimin e sëmundjeve.
“Gjatë karantinës për shkak të COVID-19, mbylljet e muzeve ndikuan negativisht në mirëqenien e njerëzve”, tha Julie Courcier Delafontaine, drejtoreshë e departamentit të kulturës në qytet.
“Ky ishte një nxitës i vërtetë dhe ishim të bindur se kultura është thelbësore për mirëqenien e njerëzimit,” shtoi ajo.
Iniciativa do të testohet për një vit dhe mund të zgjerohet në aktivitete të tjera si teatri.
“Do të donim që ky projekt të përparonte dhe të kishim mjaft pacientë për të dëshmuar vlerën e tij, dhe një ditë, pse jo, sigurimi shëndetësor të mbulojë kulturën si një formë terapie,” shtoi Courcier Delafontaine. /Katror.info
Përgatiti:
