Artisti i mikro-skulpturës vendos rekord botëror për skulpturën më të vogël

Një artist i mikro-skulpturës ka vendosur një rekord të ri Guinness për krijimin e skulpturës më të vogël të punuar me dorë.

David A Lindon, nga Bournemouth, tha se krijimi i saj kërkoi muaj të tërë planifikimi dhe realizimi.

Ai vendosi rekordin botëror me një skulpturë të një cope të kuqe Lego, e cila ka përmasa 0.02517 mm me 0.02184 mm, shkruan BBC, transmeton Katror.info.

Lindon, një inxhinier që nisi të merret me mikro-art në vitin 2019, thotë se skulptura e tij është afërsisht sa madhësia e një qelize të bardhë të gjakut.

Ai është bërë i njohur për krijimin e veprave artistike në miniaturë, duke përfshirë tre rikrijime mikroskopike të kryeveprave të Van Gogh-ut mbi një mekanizëm ore, të cilat u shitën për 90,000 paund.

Krijimi më i fundit i z. Lindon, i punuar nga një copë e kuqe Lego, u mat me mikroskop optik nga ekipi i Evident Scientific.

Më pas, Spectrographic Limited në Leeds e verifikoi atë si skulpturën më të vogël të realizuar ndonjëherë.

Kjo copë Lego është katër herë më e vogël se rekordi i mëparshëm, i vendosur në vitin 2017 nga artisti i mikro-skulpturës Dr. Willard Wigan MBE – i cili ishte frymëzimi i z. Lindon për t’u futur në këtë art.

Lindon krijoi tri madhësi të copëzave Lego, duke përdorur mjete mikroskopike të punuara me dorë, dhe punoi nga gjashtë deri në dhjetë orë çdo natë për të shmangur vibracionet e trafikut të ditës.

Copëza e tij Lego me tetë pika u mat si struktura më e ngushtë e krijuar ndonjëherë, ndërsa copëza më e vogël me katër pika thyeu rekordin e vendosur në vitin 2017.

Megjithatë, Lindon krijoi edhe një copë më të vogël, me një pikë, dhe e thyeu rekordin e tij personal brenda 20 minutash.

Të treja skulpturat janë aq mikroskopike sa nuk mund të shihen me sy të lirë.

Aktualisht, ai po përgatitet për hapjen e një ekspozite të re, “Kopshti Zoologjik më i Vogël në Botë”, që do të mbahet në Poole këtë verë. /Katror.info