Agjencia e Statistikave të Kosovës (ASK) ka publikuar të dhënat më të fundit nga Regjistrimi i Popullsisë, Ekonomive Familjare dhe Banesave 2024, duke ofruar një panoramë të plotë mbi strukturën e banesave dhe ndërtesave në të gjitha komunat e Kosovës, shkruan Katror.info.
Sipas raportit, në vend janë regjistruar gjithsej 581,095 banesa, prej të cilave 356,959 janë të banuara nga një ose më shumë banorë.
Ndërsa, një shifër e konsiderueshme prej 207,165 banesash, ose 35.7 për qind, rezultojnë të pabanuara. Këto përfshijnë banesat që janë në dispozicion për shitje, qira ose përdorime të tjera.
Mundesh me e lexu edhe…
Të dhënat e publikuara nga Agjencia e Statistikave të Kosovës (ASK) përfshijnë indikatorë të rëndësishëm që ndihmojnë në kuptimin e strukturës së banesave në vend.
Ato përfshijnë numrin e banesave sipas komunave, shpërndarjen e tyre në zonat urbane dhe rurale, si dhe klasifikimin në banesa të banuara dhe të pabanuara. Po ashtu, ASK ka ofruar të dhëna për llojet e furnizimit me ujë dhe të shkarkimit të ujërave të zeza, mënyrat e ngrohjes që përdoren në banesa, si dhe numrin e dhomave në banesat e zakonshme.
ASK vlerëson se ky publikim paraqet një burim të rëndësishëm për analizë dhe për ndërtimin e politikave zhvillimore, duke ndihmuar në planifikimin e qëndrueshëm të hapësirës për banim dhe në përmirësimin e kushteve të jetesës në të gjithë vendin.
Gjithashtu, raporti ndihmon komunat dhe institucionet përkatëse që të kuptojnë trendët urbanë dhe ruralë, si dhe të identifikojnë më mirë nevojat për infrastrukturë dhe shërbime publike në të ardhmen. /Katror.info
Përgatiti:
