Tregtia, ndërtimtaria dhe arsimi vazhdojnë të jenë ndër sektorët kryesorë të punësimit në Kosovë, sipas të dhënave të publikuara nga Agjencia e Statistikave të Kosovës (ASK) në Anketën e Fuqisë Punëtore (AFP) për tremujorin e dytë të vitit 2024, shkruan Katror.info.
Sipas raportit, tregtia përbën 20,2% të të punësuarve, duke u renditur si sektori më i madh i punësimit në vend. Pas tij vijnë ndërtimtaria me 11,9% dhe prodhimi me 11,4%. Ndërkaq, arsimi përbën 9,2% të të punësuarve, duke u pozicionuar si një sektor i rëndësishëm për tregun e punës në Kosovë.
Raporti gjithashtu vë në dukje ndryshimet në strukturën e punësimit sipas gjinisë.
Mundesh me e lexu edhe...
Femrat dominojnë në sektorët e arsimit, tregtisë dhe kujdesit shëndetësor, ku përqindja e tyre arrin në 51,2%.
Në anën tjetër, meshkujt janë më të përfaqësuar në sektorët e tregtisë, ndërtimtarisë dhe prodhimit, duke përbërë 47,5% të të punësuarve.
Në përgjithësi, shkalla e punësimit në Kosovë ka arritur në 38,4%, duke shënuar një rritje prej 2,5% krahasuar me të njëjtën periudhë të vitit të kaluar.
Ndërkohë, shkalla e papunësisë mbetet në 10,7%, e pandryshuar nga viti i kaluar. Megjithatë, papunësia tek të rinjtë (15-24 vjeç) është rritur në 21,2%, një shqetësim për tregun e punës në vend.
Sipas raportit, dy të tretat e popullsisë së Kosovës (1 074 704 persona) janë në moshë pune, ndonëse ky numër ka rënë me 85 960 individë krahasuar me tremujorin e dytë të 2023-ës. Numri i personave aktivë në tregun e punës është ulur në 461 675, ndërsa numri i të punësuarve ka pësuar një rënie prej 7 668, duke rënë në 412 482.
Ndërkohë, numri i personave të papunësuar ka arritur në 49 194, që është 1 193 më pak sesa në të njëjtën periudhë të vitit paraprak.
Papunësia tek të rinjtë (15-24 vjeç) mbetet shqetësuese, duke arritur në 21,2%, një rritje prej 5,0% krahasuar me vitin e kaluar. Ndërkohë, shkalla e jo-aktivitetit është ende e lartë, me 57,0% të popullsisë jashtë tregut të punës, ndonëse ka shënuar një rënie prej 2,8%.
Pavarësisht përmirësimeve në disa tregues, shkalla e jo-aktivitetit mbetet e lartë në 57,0%, edhe pse ka rënë me 2,8% krahasuar me vitin e kaluar. Ky fenomen është veçanërisht i theksuar tek gratë, ku 75,0% e tyre janë jashtë tregut të punës, krahasuar me 39,1% tek meshkujt.
Të dhënat e Anketës së Fuqisë Punëtore (AFP) për TM2 2024 tregojnë një panoramë të qartë të zhvillimeve në tregun e punës në Kosovë, duke nënvizuar rëndësinë e sektorëve kryesorë të punësimit dhe nevojën për politika të mëtejshme për uljen e papunësisë dhe rritjen e përfshirjes së grave në tregun e punës. /Katror.info
Përgatiti:
