Në botën moderne, ku arti shpesh qëndron larg industrisë, ekzistojnë individë që i shndërrojnë këto dy fusha në një unitet kreativ.
Një nga ta është Avni Gallapeni, një artist dhe dizajner nga fshati Dobërdelan i Kosovës, i cili me punën dhe përkushtimin e tij ka arritur të nisë një karrierë në skenën ndërkombëtare.
Historia e Avni Gallapenit është një dëshmi e fuqisë së ëndrrave dhe punës së palodhur.
Mundesh me e lexu edhe…
Ai ka arritur të ndërtojë një urë të fortë midis artit dhe industrisë, duke dëshmuar se këto dy fusha mund të bashkëjetojnë dhe të krijojnë diçka të jashtëzakonshme.
Gallapeni në një intervistë për Katror Media thekson se ndonëse industria dhe arti janë dy fusha të dallueshme me kontraste të theksuara, kreativiteti, vullneti dhe puna e palodhur e bëjnë çdo gjë të mundur.
Rrugëtimi i tij përshkoi një trajektore shumë frymëzuese që nisi në atelenë modeste të babait të tij, vijoi në Qendrën Rinore ‘Shtëpia e Fellbahut’ në Suharekë, pastaj me vizatimet e para në Akademinë e Arteve në Prishtinë dhe arriti suksesin e parë ndërkombëtar me dizajnimin e këpucëve ekskluzive për kompaninë ‘Chair’, që tashmë shkel skenat prestigjioze profesionale.
Avni Gallapeni, një artist i talentuar dhe i përkushtuar, ka kaluar shumë vite duke u përgatitur intensivisht për të ndjekur studimet në Akademinë e Arteve në Prishtinë, ku edhe ka përfunduar studimet Baçelor në Dizajn Grafik.
Studimet në Akademi ishin për të një periudhë e artë për zhvillimin e tij si artist. Duke punuar me profesorë dhe studentë të talentuar, ai përvetësoi teknika dhe qasje të reja, të cilat më vonë i aplikoi me sukses në industrinë e dizajnit të këpucëve.
Gjatë kësaj periudhe, ai thotë se ka pasur mundësinë të rritet si artist dhe të zhvillojë aftësi teknike, duke studiuar nën mbikëqyrjen e profesorëve të njohur dhe në një mjedis të pasur me talentë të rinj.
Ky ambient, vlerëson ai, i ka mundësuar atij të kuptojë dhe të praktikojë teknika të ndryshme, deri sa ato i ka përvetësuar plotësisht.
Ai e quan ‘fat të madh’ mundësinë e të përvetësuarit e të dy aspekteve, atë kreativ dhe teknik.
Aktivitetet e shumta, përfshirë ekspozitat personale dhe kolektive, kolonitë e artit dhe eventet e tjera, kanë pasur një ndikim të madh në zhvillimin e tij profesional.
Pas përfundimit të studimeve në Prishtinë, Gallapeni filloi punën në fabrikën e këpucëve ‘Solid Shoes’ në Suharekë. Ky ishte momenti kur ai filloi të kombinonte artin dhe dizajnin industrial. Me përkushtim të madh, ai zhvilloi dhe realizoi dizajne që ishin jo vetëm funksionale, por edhe tërheqëse për syrin.
Për të, përkrahja ishte thelbësore, si një i ri që sapo kishte përfunduar studimet dhe kishte ëndrra të mëdha e një vizion të qartë, ai ia atribuon një pjesë të suksesit të tij Fabrikës së Këpucëve ‘Solid’, e cila jo vetëm që i hapi dyert, por edhe i besoi punën, dhe i ofroi gjithçka për të cilin kishte nevojë në procesin e punës.
Ky kalim shënoi fillimin e një karriere të re dhe emocionuese.
Përkushtimi i tij kulmoi në vitin 2023 me një projekt madhor; krijimi i një modeli këpuce për ekuipazhin e linjës ajrore ‘Chair Airlines’.
Ky dizajn u bë simbol i suksesit të tij, duke u përdorur nga stafi i linjës dhe duke arritur dyqanin ekskluziv ‘SneakerZH’ në Cyrih.
Avni Gallapeni në një rrëfim për Katror.info, ndau me pasion procesin e punës së krijimit të dizajneve të ndryshme në të cilat punon ai.
Ai thekson rëndësinë e të kuptuarit të materialeve dhe qasjes së kujdesshme në çdo hap të punës. Nga skicat fillestare deri te produkti final, ai ndjek një metodologji që kombinon estetikën, funksionalitetin dhe qëndrueshmërinë.
Dizajni i tij reflekton një harmoni të përkryer mes këtyre elementeve, duke krijuar produkte që janë tërheqëse dhe të qëndrueshme.
Për të realizuar një këpucë perfekte, ai thekson rëndësinë e e të pasurit një ide të qartë dhe të kuptuarit të specifikave të ndryshme që kërkon secili lloj këpuce.
‘’Suksesi në këtë proces kërkon një njohuri të thellë të materialeve dhe proceseve të punës, duke u përpjekur gjithashtu të krijoni një dizajn që është estetik dhe funksional, që është i përshtatshëm për këmbën, i qëndrueshëm ndaj kushteve atmosferike dhe i realizueshëm me një kosto të arsyeshme. Pas krijimit të skicës finale, procesi vazhdon me krijimin e shabllonave dhe prerjen e materialeve, ndjekur nga montimi dhe qepja, derisa testi i produktit të finalizohet dhe korrigjimet e nevojshme të bëhen’’ tha ai.
Ai gjithashtu thekson se aspekti teknik ka një rëndësi thelbësore, nga gjetja e materialeve, krijimi i cilësisë e deri te përpjekja e krijimit të këpucëve të qëndrueshme, ekologjike, të riciklueshme, ortopedike si dhe inovative.
‘’Aspekti teknik është veçanërisht i rëndësishëm në industrinë e këpucëve, pasi realizimi i një produkti të tillë kërkon precizitet maksimal, sfida më e madhe mbetet gjetja e materialeve të cilësisë më të lartë, të qëndrueshme dhe inovative, si dhe përpjekja për t’i përdorur ato në mënyrë që të ofrojnë një produkt të qëndrueshëm dhe ekologjik, të riciklueshmëm dhe sa më inovative’’ thotë ai.
Një nga projektet më të suksesshme të tij ishte krijimi i një linje këpucësh që fillimisht ishte menduar për përdorimin e brendshëm të personelit të kompanisë ‘Chair’, por më vonë mori një vëmendje të madhe nga publiku.
Këpucët u shitën ekskluzivisht në dyqanin e njohur në Cyrih, ‘Sneakerzh.ch’, dhe kjo ka sjellë një numër të madh komentesh pozitive nga përdoruesit.
Ai ndihet i kënaqur kur sheh njerëz që mbajnë këpucët e tij, të lumtur dhe pa e ditur se ato janë krijuar nga ai.
‘’Kënaqësia më e madhe është ku i sheh që njerëzit kanë mbathur këpucët e dizajnuara nga unë’’ thekson ai.
Kjo këpucë, varësisht nga lloji mund të prodhohet në bashkëpunim me partnerët e Gallapenit në Kosovë, Itali, Turqi dhe Portugali, ndërsa momentalisht është duke punuar në një koleksion të ri për një kompani të njohur gjermane.
Synimi i tij është të promovojë projekte që lidhin Kosovën me tregun ndërkombëtar, duke dëshmuar se potenciali i vendit të tij është i pashtershëm.
Ky rrugëtim tregon se me pasion dhe punë të palodhur çdo ëndërr mund të bëhet realitet dhe çdo ide mund të transformohet në diçka të madhe.
Ai inkurajon të rinjët e Kosovës, të besojnë në aftësitë e tyre dhe të mos ndalen kurrë së mësuari.
‘’Suksesi nuk është rastësi, është rezultat i qëndrueshmërisë dhe guximit për të ecur përpara, edhe kur rruga duket shumë e vështirë’’ përfundon ai.
Me një pasion të pandalshëm dhe përkushtim të jashtëzakonshëm, Gallapeni na tregon se kufijtë ekzistojnë vetëm në mendjet tona./Katror.info
Përgatiti:
