Federata e Bjeshkatarisë dhe Ngjitjes Sportive e Kosovës njofton se alpinistët kosovarë, Mrika dhe Arianit Nikçi, janë bërë pjesë e Librit të Rekordeve Guinness. Ata janë babë e bijë të parë në botë që kanë ngjitur më së shpejti shtatë majat më të larta të shtatë kontinenteve, të njohura si “Seven Summits”, raporton Katror.info.
Ky rekord u arrit në periudhën prej 25 janarit 2018 deri më 15 gusht 2019, duke zgjatur një vit e 202 ditë. Gjatë kësaj kohe, dy alpinistët shqiptarë arritën të ngjisin majat më të njohura: Everestin në Azi, Aconcagua-n në Amerikën Jugore, Denalin në Amerikën Veriore, Kilimanjaron në Afrikë, Elbrusin në Evropë, Carstensz Pyramid në Oqeaninë dhe Vinson Massif në Antarktidë.
Ky sukses historik shënon herën e parë që Kosova përmendet në Librin e Rekordeve Guinness për një arritje të tillë në sportin ekstrem të alpinizmit. Përpos vlerësimit ndërkombëtar, rekordi dëshmon potencialin dhe vlerat e shqiptarëve në arenën globale, duke sjellë një moment krenarie për Kosovën dhe komunitetin shqiptar kudo në botë.
Mundesh me e lexu edhe…
Mrika Nikçi, përveçse bashkëautorja e këtij rekordi, u bë femra më e re në botë që arriti të ngjisë këto shtatë maja. Arianit Nikçi, si prind dhe alpinist, udhëhoqi këtë rrugëtim, duke treguar përkushtimin dhe disiplinën që kanë shoqëruar gjithë sfidën.
Ky rekord përfaqëson një dëshmi të fuqishme se me guxim, vullnet dhe përkrahje familjare, ëndrrat mund të realizohen, edhe nga vendet më të vogla dhe të reja në arenën ndërkombëtare./Katror.info
