Bashkimi Evropian ka shtyrë kundërmasat e para kundër Shteteve të Bashkuara mbi tarifat e metaleve të presidentit Donald Trump deri në mes të prillit, duke e lejuar atë të rimendojë se cilat mallra amerikane të godasë dhe duke ofruar javë shtesë për negociata.
Komisioni Evropian kishte propozuar ri-vendosjen e tarifave të vitit 2018 mbi 4.5 miliardë euro (4.9 miliardë dollarë) të produkteve amerikane më 1 prill, e ndjekur nga goditja e 18 miliardë eurove të tjera të mallrave amerikane më 13 prill, shkruajnë mediat e huaja, përcjell Telegrafi.
“Tani po shqyrtojmë të përafrojmë kohën e dy grupeve të kundërmasave të BE-së, në mënyrë që të mund të konsultohemi me vendet anëtare në të dyja listat njëkohësisht, dhe kjo do të na jepte gjithashtu kohë shtesë për negociata me partnerët tanë amerikanë”, tha Komisioneri Evropian i Tregtisë, Maros Sefcovic në një seancë dëgjimore në Parlamentin Evropian të enjten.
Mundesh me e lexu edhe...
Komisioni më pas konfirmoi se të gjitha kundërmasat e BE-së do të hynin në fuqi në mes të prillit.
Trump kërcënoi se do të vendoste një tarifë 200% për të gjitha verërat dhe produktet e tjera alkoolike që vijnë nga BE nëse blloku vazhdon me këtë.
Administrata Trump po planifikon gjithashtu tarifa “reciproke” më 2 prill për të ribalancuar sistemin tregtar global.
Sefcovic tregoi se ai kishte bërë përparim të kufizuar me homologët amerikanë në bisedimet e deritanishme, si për propozimin e tij për të diskutuar mbi uljen e tarifave të importit për mallrat industriale.
Vonesa e kundërmasave mund të lejojë disa rregullime për mallrat e synuara të SHBA-së.
Kryeministri francez Francois Bayrou tha të dielën se BE-ja ndoshta gaboi në shënjestrimin e uiskit amerikan, ndërsa kryeministrja italiane Giorgia Meloni paralajmëroi partnerët e BE-së të martën kundër përshkallëzimit të mosmarrëveshjes tregtare me Shtetet e Bashkuara.
Franca dhe Italia janë eksportuesit më të mëdhenj të verës në Shtetet e Bashkuara.
E kryeministri Micheal Martin i Irlandës, një eksportues i madh i uiskit, tha të enjten se ishte e arsyeshme që Evropa po i jepte vetes kohë pas 2 prillit për të vlerësuar paketën e masave të SHBA-së dhe më pas “të përgjigjet me mençuri dhe strategji”. /Katror.info
Përgatiti:
