Evropa mund të jetë e preokupuar me kampionatin e futbollit tani, por rregullatorët e BE-së nuk po e lënë anash aspak Meta-n.
Meta vendosi të vonojë lëshimin e modeleve të saj me AI në Evropë: kjo vjen pas një direktive nga rregullatori irlandez i privatësisë për të vonuar planet e Metës për të përdorur të dhënat nga përdoruesit e Facebook dhe Instagram.
Në thelb të gjithë kësaj është grupi i avokimit NOYB, një organizatë jofitimprurëse me qendër në Austri, e cila u kërkoi autoriteteve të mbrojtjes së të dhënave në disa vende evropiane të ndërmarrin veprime kundër Meta-s.
Mundesh me e lexu edhe...
Çështja qëndron në qëllimin e Meta për të përdorur të dhënat personale për trajnimin e modeleve të saj të AI pa pëlqimin e përdoruesit, megjithëse kompania pretendoi se do të përdorte vetëm informacione të disponueshme publikisht dhe të licencuara në internet.
Andaj, Komisioni Irlandez i Mbrojtjes së të Dhënave (DPC) i kërkoi Meta-s të shtyjë trajnimin e modeleve të tij të mëdha gjuhësore (LLM) me përmbajtje publike nga përdoruesit e Facebook dhe Instagram, shkruajnë mediat e huaja, transmeton Telegrafi.
Meta shprehu zhgënjimin për kërkesën, duke vënë në dukje se ajo mbante të informuara autoritetet evropiane të mbrojtjes së të dhënave që nga marsi. Kompania deklaroi se pa informacion lokal, nuk mund të ofronte një përvojë me cilësi të lartë, duke parandaluar kështu lëshimin e Meta AI në Evropë.
Ndërkohë, Apple dhe Meta ka të ngjarë të përballen me akuza sipas Aktit të Tregjeve Dixhitale të BE-së (DMA) përpara verës, thuhet në një raport tjetër.
Komisioni Evropian, pasi ka nisur hetimet për Apple, Meta dhe Google në mars, i jep përparësi Apple dhe Meta. DMA synon të frenojë fuqinë e Big Tech, të nxisë konkurrencën nga rivalët më të vegjël dhe të lehtësojë lëvizjen më të lehtë midis shërbimeve konkurruese në internet.
Rregullatorët e BE planifikojnë të nxjerrin gjetje paraprake të ngjashme me akuzat antitrust deri në gusht, me Apple që pritet të akuzohet i pari, i ndjekur nga Meta. Ndërsa Komisioni dhe Meta nuk pranuan të komentojnë, Apple përsëriti besimin e saj në përputhje me DMA dhe angazhimin e saj konstruktiv të vazhdueshëm me Komisionin.
Gjobat mund të përfshijnë deri në 10 për qind të qarkullimit vjetor global të një kompanie për shkelje.
Apple ka të ngjarë të përballet me akuza sepse rregullat e saj e bëjnë të vështirë për zhvilluesit e aplikacioneve që t’u tregojnë përdoruesve ofertat jashtë App Store dhe ka shtuar tarifa të reja për zhvilluesit.
Meta është duke u hetuar për modelin e saj të ri, ku përdoruesit ose paguajnë një tarifë abonimi ose japin pëlqimin për reklama në Facebook dhe Instagram./Katror.info
Përgatiti:
