Bebe Rexha dhe invazioni i vajzave shqiptare në muzikën botërore

Nëse Rita Ora e ka hapur shtegun e suksesit dhe Dua Lipa e ka betonuar atë shteg nga Britania, edhe përtej Oqeanit Atlantik e kanë dëshmuar këtë sukses vajzat nga trevat tona. Kur në moshën 21-vjeçare Flamur Rexha nga Dibra emigroi në Shtetet e Bashkuara, është vështirë të besohet se ai mund ta kishte parashikuar që tri dekada më vonë vajza e tij, Bleta, do të bëhej këngëtare, kompozitore dhe autore tekstesh të muzikës me sukses dhe famë globale.

Në vitin 2013, reperi Eminem realizoi njërin ndër hitet më të mëdha të tij, “The Monster”, në duet me Rihannën, i cili u rendit në vendin e parë në pothuajse të gjitha top-listat botërore dhe fitoi çmimin Grammy. Pak kush asokohe kishte vënë re se bashkautore e këtij hiti ishte Bebe Rexha, pra Bleta Rexha.

Kënga “Hey Mama” nga David Guetta, në bashkëpunim me Nicki Minaj, Afrojack dhe Bebe Rexhën, nuk do të kishte qenë aq e suksesshme pa kontributin bashkautor të Bleta Rexhës, e cila për autorësi përdori emrin e saj të vërtetë.

Në vitin 2017, bashkëpunimi “Meant to Be” me dyshen amerikane të muzikës country Florida Georgia Line theu rekorde, duke u bërë kënga country më e transmetuar e të gjitha kohërave në Spotify. Ajo u nominua edhe për Performancën më të Mirë të Duetit/Grupit Country në Çmimet e 61-ta Grammy. Edhe në këtë rast, Bleta Rexha ishte bashkautore, e kredituar me emrin e saj të plotë.

Dhe kështu mund të vazhdonim gjatë — në rap, hip-hop, country, apo pop — Bebe Rexha ka qenë dhe mbetet një emër i kudondodhur në muzikën amerikane në dy dekadat e fundit. Ajo ka grumbulluar më shumë se 12 milionë shitje të përgjithshme të këngëve, 6 miliardë transmetime globale dhe një audiencë radiofonike prej më shumë se 10 miliardësh. I gjithë ky talent, te një vajzë nga një familje modeste shqiptare në Nju Jork.

Bleta Rexha lindi më 30 gusht 1989, në Brooklyn, New York, nga prindër shqiptarë me origjinë nga Maqedonia e Veriut. Babai i saj, Flamur Rexha, lindi në Dibër dhe ishte mjeshtër picash, ndërsa nëna e saj, Bukurie Rexha, lindi në Shtetet e Bashkuara, në një familje shqiptare me rrënjë nga Gostivari. Babai i Bebes e ngriti familjen duke bërë pica në Nju Jork, kështu që, natyrisht, ajo ka pikëpamje të forta mbi këtë temë.

“Një picë e mirë duhet të jetë e thjeshtë”, thotë ajo, “Pica më e mirë ka një kore të këndshme krokante, pastaj një salcë domatesh të shkëlqyer dhe një mocarela shumë të mirë. Kur e palosni përgjysmë, nuk duhet të përmbyset, duhet të qëndrojë drejt. Dhe gjithmonë duhet të ketë një grimcë të vogël vaji që rrëshqet në mjekër. “Ky është pasioni im i vërtetë,” pat thënë Bebe më 2018.

Në moshën tetëvjeçare, ajo vendosi të fillonte të luante në bori, instrument të cilit ia atribuon mprehjen e veshit për melodinë. Rexha fillimisht mësoi vetë të luante bori dhe më vonë mësoi gjithashtu të luante kitarë dhe piano. Ajo ndoqi shkollën e mesme Tottenville në Staten Island, ku këndoi në kor dhe mori pjesë në një sërë muzikalesh. Gjatë kohës në korin e shkollës së mesme, ajo zbuloi se ishte një soprano koloraturë, lloj sopranoje operistike që karakterizohet nga ritme të shpejta, alternime dhe trille të sakta.

Si adoleshente, ajo paraqiti një këngë për t’u interpretuar në kompetencën vjetore “Grammy Career Day” të Akademisë Kombëtare të Arteve dhe Shkencave të Regjistrimeve, dhe fitoi çmimin “Këngëshkruesja më e mirë për adoleshentë” nga 700 konkurrues. Si rezultat, ajo nënshkroi një kontratë me zbuluesen e talenteve Samantha Cox.

Në vitin 2010, Pete Wentz nga grupi rock-punk Fall Out Boy, gjatë një pauze në studio, dëgjoi rastësisht Bebe-n duke kënduar në dhomën tjetër. Brenda pak minutash, ata ranë dakord se duhej të formonin një grup të ri, dhe kështu u krijua grupi Black Cards.

I prezantuar si një “bashkim i muzikës reggae dhe elektronike”, Black Cards vazhdoi të publikonte disa këngë, duke përfshirë Club Called Heaven dhe Dr. Jekyll & Mr. Fame. Megjithatë, në janar 2012, Wentz njoftoi se Bebe kishte lënë grupin për të ndjekur projekte të tjera. Bebe Rexhës iu dha Bursa Abe Olman (themeluesit të Sallës së Famës së këngëshkruesve) për kontributet e saj si kompozitore. Black Cards, si grup, më vonë atë vit pushoi së vepruari.

Pasi Black Cards u shpërbë, Bebe nënshkroi një marrëveshje me Island Records, e cila gjithashtu nuk funksionoi. Këngëtarja ishte e dëshpëruar, por ajo këmbënguli.

“Isha e gatshme ta rrëzoja derën me shkelm. Unë nuk do të largohesha. Nëse dikush do të ma hapte derën dhe do të më përzinte, unë do të trokisja përsëri dhe do të thosha: ‘Jam kthyer!’” – tha ajo për BBC në vitin 2018.

Ajo, më në fund, fitoi njohje si kompozitore, duke shkruar hite për Selena Gomez dhe grupin korean Shinee, ndërsa përfshinte dhimbjen dhe frustrimin nga refuzimet e mëparshme në këngët e saj.

Në vitin 2013, Bebe filloi të shkruante një këngë të quajtur “Monster Under My Bed”, e cila ishte menduar të përfshihej në albumin e saj debutues.

Ankthin dhe depresionin që trajtonte kënga, ajo i konsideronte si pjesë të “përbindëshit” që mbante brenda vetes. “Ishte një këngë për veten time, ku thashë: ‘Kjo është ajo që jam. Nuk po ndryshoj dhe duhet ta pranoj,” kishte treguar ajo.

Demoja origjinale përmbante dramë emocionale me atmosferë të errët, dhe Bebe kishte një ndjesi intuitive se Eminem do të lidhej me frymën e tekstit. Intuita e saj rezultoi e saktë: Eminem e realizoi këngën me titullin “The Monster”. Ai e shndërroi këngën në një sukses botëror, duke arritur vendin e parë në 23 shtete. Edhe pse Rihanna e zëvendësoi Beben në refren, vokalet origjinale të Bebe-s në sfond mbetën të paprekura.

Në vitin 2013, Rexha nënshkroi një kontratë me Warner Bros. Records si artiste solo. Më 21 mars 2014, ajo publikoi këngën e saj të parë, “I Can’t Stop Drinking About You”. Më 12 maj 2015, ajo publikoi EP-në e saj të parë, “I Don’t Wanna Grow Up”, përmes Warner Bros Records.

Që atëherë, Rexha ka bashkëshkruar dhe realizuar “Hey Mama” nga David Guetta, Nicki Minaj dhe Afrojack, e cila u nominua për çmimin Billboard Music Award për këngën më të mirë Dance/Electronic. Ajo gjithashtu u rendit në vendin e parë si në listat Billboard Pop, ashtu edhe në ato Rap me këngën e saj të suksesshme “Me, Myself & I” me G-Eazy. Kënga e saj “I Got You” ka më shumë se 265 milionë shikime, ndërsa “No Broken Hearts”, me Nicki Minaj, ka më shumë se 253 milionë shikime.

Ajo gjithashtu është pjesë e këngës së Martin Garrix, “In the Name of Love”, e cila ka grumbulluar më shumë se 414 milionë shikime. Rexha publikoi EP-në e saj të dytë dhe tretë, “All Your Fault: Part 1”, dhe , “All Your Fault: Part 2”, në vitin 2017. Albumi i saj i parë “Expectations” u publikua më 22 qershor nga Warner Bros Records dhe përmban këngën e saj të suksesshme, “I’m a Mess”, si dhe hitin e saj global, “Meant to Be”, me Florida Georgia Line, i cili qëndroi në listën e këngëve country të Billboard për 50 javë rresht, duke thyer rekordin. Rexha u nominua në dy kategori për Çmimet e 61-ta vjetore GRAMMY: për Artistin më të Mirë të Ri dhe për Performancën më të Mirë të Dyshes/Grupit Country. Billboard e quajti Bebe Rexhën “një nga artistet më të guximshme të vitit 2017”.

Bebe, në albumin e saj të dytë “Better Mistakes”, punoi dhe e përfundoi atë para pandemisë COVID-19. Më 15 prill 2021, ajo zbuloi listën e këngëve në llogaritë e saj në mediat sociale. Albumi u bë i disponueshëm për porosi paraprake më 16 prill, pas publikimit të këngës “Sabotage”. Bebe e përshkroi albumin si një album pop me “shumë elemente hip-hop”.

Kënga hapëse, “Break My Heart Myself”, në të cilën merr pjesë Travis Barker, i referohet mënyrës se si Rexha jeton me çrregullimin bipolar. Robin Murray nga revista Clash e quajti albumin një “përvojë pop si buldozer, që i jep Bebe Rexhës hapësirë për të amplifikuar fuqinë e saj ndërsa ekspozon pasiguritë e saj”, duke e përmbledhur më tej si “13 këngë që nxjerrin në pah të vërtetat e tyre”.

E inspiruar nga muzika e viteve 1970, Bebe Rexha publikoi albumin e saj të tretë më 2023, i cili përmban elementë të funky, disco, pop dhe rock. Albumi fokusohet në temat e fuqizimit, vetëreflektimit dhe zhvillimit personal. Tre këngë, “Heart Wants What It Wants”, “Call on Me” dhe “Satellite” me Snoop Dogg, u publikuan midis shkurtit dhe prillit 2023, ku u përfshi edhe hiti “I’m Good (Blue)” me David Guetta. “Heart Wants What It Wants”, “Satellite” dhe kënga jashtë albumit, “Seasons” me legjendën e muzikës country, Dolly Parton, u shoqëruan me videoklipe. Bebe mori një pritje të ngrohtë nga kritikët për muzikën, tekstet dhe interpretimet vokale, si dhe për shkathtësinë e saj artistike.

Bebe Rexha ka marrë pjesë gjithashtu edhe në filma dhe televizion. Debutimi i saj ishte në filmin artistik të vitit 2021, në komedinë kriminale “Queenpins”. Ajo gjithashtu i dha zërin personazhit Tuesday në filmin e animuar të vitit 2019, “UglyDolls”, dhe u shfaq si trajnere në The Voice. Në “Queenpins”, Bebe luan rolin e Tempe Tina, një hakere kompjuterësh.

Përveç talentit artistik, Bebe Rexha ka edhe aftësi lidershipi, me iniciativa të mëdha në shumë fusha. Në vitin 2018, Bebe organizoi një darkë në Hollywood për artistet, kompozitoret dhe producentet më të suksesshme femra – duke përfshirë Kelsea Ballerini, Avril Lavigne, Charli XCX, Emily Warren (e cila shkroi “New Rules” për Dua Lipën) dhe Erika Ender (e njohur për “Despacito” të Luis Fonsit). Të gjithë pjesëmarrësit në tryezë kishin dhjetë hitet më të mira – dhe të gjitha ishin krijuar nga gra.

E quajtur “Women In Harmony”, ngjarja ishte krijuar për të forcuar lidhjet midis grave në një industri të dominuar nga meshkujt.

“Problemi është se 84% e këngëve në radio janë të shkruara nga meshkujt, kështu që sigurisht që gratë ndonjëherë bëhen pak të rezervuara dhe shfaqin konkurrencë, sepse kemi pak hapësirë në këtë industri,” tha ajo në këtë rast dhe vazhdoi: “Pra, mënyra se si e përmirësojmë pozitën tonë është të krijojmë më shumë hapësirë për veten tonë. Si e bëjmë këtë? Shtrojmë darka, ndërtojmë marrëdhënie, mbështesim femrat e tjera, telefonojmë njëra-tjetrën, bëjmë takime, bashkëpunojmë me njëra-tjetrën – në vend që të bëjmë garë konkurruese ku përpiqemi të eliminojmë njëra-tjetrën,” përfundoi ajo.

Bebe Rexha nuk e ka kursyer veten as në aktivitetet humanitare. Ajo ka marrë pjesë dhe ka performuar në gala-t e amfAR, të cilat mbledhin fonde për kërkimin, parandalimin dhe edukimin mbi AIDS-in. Po ashtu, është një avokate e zëshme për ndërgjegjësimin mbi shëndetin mendor, duke përdorur platformën e saj për të ulur stigmën dhe duke folur publikisht për përvojat e saj me çrregullimin bipolar dhe sfida të tjera. Në vitin 2019, ajo vet zbuloi se vuan nga çrregullimi bipolar, ndërsa në vitin 2023 u diagnostikua me sindromën e vezoreve policistike. Ajo mori pjesë në fushatën “Getting Better Together” të Institutit “Child Mind” për të luftuar stigmën lidhur me shëndetin mendor te fëmijët.

Pas tërmetit të vitit 2019, Rexha udhëtoi drejt Shqipërisë për të ofruar ndihmë, duke dhuruar personalisht fonde dhe më pas duke marrë përsipër rindërtimin e shtëpisë së një familjeje të shkatërruar. Ajo ka bërë thirrje publike për donacione për Spitalin e Dibrës, i cili po përballej me mungesa fondesh, dhe ka dhuruar 10,000 euro për këtë kauzë.

Në vitin 2024, Bebe Rexha mori pjesë në Sunny Hill Festival, duke i shtuar festivalit peshë globale dhe duke e ndihmuar që ai të renditej ndër kategoritë më të mira të festivaleve në botë.

Ashtu si Rita Ora, Dua Lipa dhe Ava Max, Bebe është me prejardhje shqiptare. Suksesi i këtyre vajzave u përshkrua në një artikull të BBC-së për Bebe Rexhën si “invazioni i vajzave shqiptare në muzikën botërore”.

Kur u pyet se si e shpjegon këtë fenomen, ajo u përgjigj: “Ka diçka në ujë në trevat tona që na bën zërin e bukur,” thotë ajo duke qeshur. “Ne jemi të forta. Jemi të ndërtuara të tilla që mund t’i rezistojmë çdo gjëje.”/Katror.info