Statuja e Leotrim Ahmetit, e krijuar nga skulptori Sabri Behramaj, e ka prekur thellë në zemër secilin person që e ka parë atë në rrjetet sociale. Është quajtur vepër minimaliste por që ka karakter monumental.
“Në dukje është e përmasave reale të një fëmiu të zakonshëm – megjithatë, do të mbetet në kujtesën e njerëzimit si gjykatë ndërkombëtare për drejtësinë e të padrejtëve, ” shkruan kritiku Naser Shatrolli.
Mundesh me e lexu edhe...
E Behramaj përmes artit e ka kthyer historinë e djaloshit të vrarë nga forcat në serbe në vitin 1998 në Rrezalle, në një thirrje për mos ta harruar të kaluarn.
Në një intervistë në RTK4, artisti Behramaj foli për procesin e krijimit nga konceptimi i idesë deri në përfundimin e veprës.
Behramaj tregon se ideja për këtë skulpturë ka rrjedhur nga intervista të realizuar nga Nysret Pllana me nënën e Leotrimit, dhe se ajo intervistë e ka prekur thellë se si ka ndodhur ngjarja dhe rrëfimi i nënës së tij dhe si skulptor, ka vendosur që t’ia bëjë një vepër për Leotrimin për t’iu treguar siç tha ai, brezave të ardhshëm për atë se çfarë ka ndodhur vërtetë në Kosovë.
Shtatorja e Leotrimit do të vendoset në një shesh në komunën e Skenderajt që e ka ndarë komuna për Leotrimin, dhe me datën 8 qershor për nder të ditës së çlirimit të Skenderajt do të inaugurohet shtatorja.
Ai tha se pas jehonës kaq të madhe nëpër rrjetet sociale që e ka marrë kjo skulpturë beson që është një mundësi e mirë për ta dërguar edhe përtej kufijve të Kosovës nëpër Evropë, për ta treguar historinë dhe si dëshmi për të treguar se kush ka bërë krime në Kosovë.
“Nuk mjafton që historia të shkruhet vetëm në letra dhe të ngelet si e tillë, por duhet t’i kthejmë në vepra arti, në filma dhe të gjitha format për ti treguar botës se çfarë ka ndodhur vërtetë në Kosovë”, tha Behramaj./Katror.info
Përgatiti:
