Benjamin Kolenoviq, 28-vjeçari nga Kosova, është përfshirë në listën “Forbes 30 Under 30”, në Kategorinë Media dhe Marketing. Ai është themelues dhe shef ekzekutiv i agjencisë së marketingut digjital “Growzillas”, me seli në Prishtinë.
Kolenoviq në një intervistë për Radio Evopa e Lirë, ka rrëfyer rrugëtimin e tij drejt kësaj arritjeje, ku këtë ai ia dedikon kompanisë dhe punës me ekipin, si dhe klientëve.
‘’Ka qenë një udhëtim profesional diku rreth 10 vjet që me arritë në këtë pikë për me u renditë në revistën 30 under 30. Kjo renditje është krejtësisht rezultat i arritjeve që i kemi pasur me Kompaninë ‘’Growzillas’’ dhe punën që e kemi bërë me ekipin dhe klientët tanë’’, ka thënë ai.
Mundesh me e lexu edhe…
Mirëpo, rrugëtimi i tij drejt suksesit nuk kishte filluar me marketingun. Ai fillimisht ka studiuar Shkenca Kompjuterike, fushë kjo me të cilën edhe ishte marrë një kohë, por më pas gjërat morën drejtim tjetër.
‘’Qysh i vogël kam qenë shumë i mirë në matematikë, edhe kur erdh koha me studiu prindërit e mi më sugjeruan edhe insistuan që unë me studiu Shkenca Kompjuterike, pasi thonin se këtu ka më shumë perspektivë. Ani pse i përfundova studimet dhe kam qenë i mirë në disa programime, prapë nuk është që m’ka flejt shumë kjo punë. Më vonë e dashura ime më propozoi që të ndjek një trajnim në fushën e Marketingut Digjitial, edhe prej aty ka fillu rrugëtimi im’’, tregon ai.
Me punët e para që kishte bërë Benjamini, kishte kuptuar se donte të arrinte në majat e marketingut digjital.
‘’Unë kur e kam përfundu trajnimin, së pari kam fillu me disa punë. Kam fillu me një website për oferta pune, kam punu si Search Engine Optimization. Kur kam arrit në një rrogë të konsiderushme (1000 euro), kam fillu me msu Paper Click. Pra jam zotu me msu krejt Marketingun digjital’’, ka shtuar ai në këtë intervistë.
Pas gjithë suksesit të tij, Benjamini ka edhe disa këshilla kujdesi drejt qëllimeve në karrierë për ata që nuk kursejnë fare energjinë e tyre për punën.
‘’Unë në fillime të karrierës kam qenë shumë entuziast dhe energjik, jam marrë me shumë punë në të njejtën kohë, dhe si rezultat kam pas edhe disa komplikime me shëndetin. Tash jam më i diciplinuar me orarin. Ju sugjeroj që t’a prioritizoni shëndetin, mos qëndroni shumë gjatë ulur, ecni, kaloni kohë me familje edhe aktivitete tjera fizike’’, këshillon Benjamini të rinjtë.
Ndërkaq, në ueb-faqen e “Forbes”, aty ku janë publikuar edhe njëzet e nëntë të përzgjedhurit e tjerë, mund të lexohet edhe një biografi e shkurtër e Kolenoviqit dhe punës së tij si themelues i “Growzillas”
“Ben Kolenoviq është themeluesi dhe CEO i ‘Growzillas’, një agjenci digjitale e suksesshme dhe inovative në Kosovë. Që nga themelimi i saj në vitin 2020, ‘Growzillas’ ka pasur një rritje mesatare vjetore prej 200 për qind duke u bërë agjencia digjitale me shpenzimet më të mëdha në Kosovë, me 25 punonjës, 85 për qind e të cilëve janë gra. Ai gjithashtu organizon ‘Growth Tank’, konferencë për marketing digjital dhe ka mbajtur seanca trajnimi për organizata të ndryshme”, është shkruar nga “Forbes”.
Kjo nuk është hera e parë që një shqiptar paraqitet në listat e “Forbes”. Dua Lipa, Rita Ora, Blerta Thaçi, Dafina O. Olluri dhe Blina Meta-Shala nga “Open data Kosova” kanë qenë gjithashtu pjesë e listës. /Katror.info
Përgatiti:
