MCA Kosova dhe Korporata e Sfidave të Mijëvjeçarit (MCC), kanë mbajtur një sesion informues me bizneset, institucionet financiare dhe organizatat e ndryshme në Kosovë, mbi qasjen në financa për projektet e energjisë së gjelbër.
Sesioni ofroi informacione për ndihmën teknike që bizneset mund të marrin dhe se si mund të shfrytëzojnë asistencën e MCA Kosova, si hap lehtësues për të siguruar kapital investimi nga Banka Amerikane për Zhvillim (DFC).
“ACFD është një mundësi shumë e mirë për Kosovën! ACFD krijon një platformë formale për të optimizuar dhe organizuar bashkëpunimin dhe i mundëson partnerit tonë lokal, MCA-Kosovës, të lehtësojë dhe mundësojë investimet e Bankës Amerikane për Zhvillim (DFC) që ndryshe nuk do të ishin të realizueshme,” tha Alexander Dixon, Drejtor i Lartë për Financa, Investime dhe Tregti në MCC.
Dy agjencitë zhvillimore federale amerikane, Korporata e Sfidave të Mijëvjeçarit (MCC) dhe Banka Amerikane për Zhvillim (DFC), kanë krijuar Katalizatorin Amerikan për Zhvillim (ACFD) si një mekanizëm të ri të financimit të kombinuar. E implementuar përmes MCA-Kosovës, kjo iniciativë synon të katalizojë investimet e sektorit privat në ekonominë e gjelbër dhe tranzicionin energjetik në Kosovë.
“MCA Kosova është e angazhuar për të hapur rrugën e zhvillimit të qëndrueshëm ekonomik dhe pavarësinë energjetike në Kosovë. Përmes ACFD, ne inkurajojmë bizneset e vendit të shfrytëzojnë mundësitë e investimeve përmes iniciativave të energjisë së ripërtërishme. Së bashku, mund të krijojmë një të ardhme më të pastër dhe më të qëndrueshme për Kosovën,” tha Florina Duli Sefaj, Drejtore Ekzekutive e MCA Kosova.
Sesioni ofroi informacione për ndihmën teknike që bizneset mund të marrin dhe se si mund të shfrytëzojnë asistencën e MCA Kosova,si hap lehtësues për të siguruar kapital investimi nga DFC. ACFD mund të financojë premiumet për garancitë, uljet e normave të interesit, letrat e kreditit, përmirësimet e krediteve, ndihmë teknike, etj.
“Këto instrumente janë të disenjuara për të zvogëluar rreziqet teknike dhe financiare të projekteve, duke e bërë më tërheqëse për investitorët privatë të bëhen pjesë e projekteve të energjisë së ripërtërishme dhe iniciativave tjera të gjelbra, përmes asistimit dhe ofrimit të financimit nga DFC.Si një institucion financiar për zhvillim, DFC mobilizon kapitalin e sektorit privat për të financuar zgjidhjet ndaj sfidave më kritike me të cilat përballet sot bota në zhvillim. Mënyrat e saj të financimit mund të lidhen me kapitalin e drejtpërdrejtë – kreditë, financimine borxheve, garancive të investimeve, ose ndihmën teknike dhe mund të variojnë nga 1 deri në 30 milionë dollarë ose më shumë”, njofton MCA Kosova.
Programi Kompakt në Kosovë, është një partneritet midis Shteteve të Bashkuara të Amerikës, që vepron përmes Korporatës së Sfida të Mijëvjeçarit, dhe Republikës së Kosovës. Përveç grantit prej 202 milionë dollarësh nga MCC, Qeveria e Kosovës kontribuon me 34.7 milionë dollarë, investim ky që në tërësi arrin shumën prej 236.7 milionë dollarësh në sektorin energjetik të Kosovës./Katror.info
Përgatiti:
