E përditësuar 11:22.
Bizneset në Kosovë protestuan sot kundër vendimit të Zyrës së Rregullatorit për Energji për kalimin në tregun e lirë të energjisë, që hyri në fuqi më 1 qershor.
Protesta u mbajt nga ora 11:00 deri në 12:00 në sheshin “Skënderbeu” në Prishtinë. Kërkesa kryesore e bizneseve është shtyrja e zbatimit të këtij vendimi për një vit, duke e konsideruar të papërgatitur tregun dhe konsumatorët për këtë ndryshim.
Mundesh me e lexu edhe...
***
Bizneset sot në protestë, kërkojnë një vit shtesë për liberalizimin e tregut energjetik
Oda Ekonomike e Kosovës (OEK), së bashku me përfaqësues të bizneseve nga e gjithë Kosova sot do të mbajnë një protestë nga ora 11:00 deri në 12:00, në sheshin “Skënderbeu”, në Prishtinë.
Siç është thënë në konferencën për media me anë të kësaj proteste kundërshtojnë mënyrën se si bizneset janë detyruar të hyjnë në tregun e lirë të energjisë elektrike, pa pasur përgatitje të mjaftueshme.
Kryetari i OEK-së, Lulzim Rafuna, ka thënë se protesta do të jetë paqësore dhe bëri thirrje që Qeveria të rishikojë vendimin e marrë.
Ai tha se kërkojnë një afat njëvjeçar dhe një paketë ligjore për të lehtësuar tranzicionin për bizneset dhe për të mbrojtur qytetarët.
“Protesta do të mbahet të mërkurën nga ora 11:00 deri në 12:00. I ftojmë të gjithë ata që preken nga ky vendim të na bashkohen për të mirën e vendit. Kërkojmë që Qeveria të reflektojë dhe të mbështesë biznesin dhe ekonominë, duke dhënë një afat të përshtatshëm për kalimin në tregun e lirë dhe duke përgatitur masa ligjore për këtë tranzicion”, tha Rafuna.
Ai shtoi se, nëse Qeveria nuk ndryshon qëndrim, bizneset do të detyrohen të vazhdojnë protestat.
Rafuna kritikoi gjithashtu ZRRE-në për mungesën e përgatitjes dhe ofertave të mjaftueshme për konsumatorët në tregun e lirë të energjisë./Telegrafi/Katror.info.
