Shqipëria turistike po vazhdon me ritme të larta.
Në muajin qershor, numri i vizitorëve jorezidentë shënoi rritje me 49,9%, në krahasim me qershorin 2023.
Instituti i Statistikave publikoi sot raportin për strukturat akomoduese, sipas të cilit, numri i vizitorëve gjithsej është rritur me 40%.
Mundesh me e lexu edhe…
Të dhënat tregojnë se numri i netqëndrimeve gjithsej është rritur me 27,1 %, ku rritjen më të madhe e patën vizitorët jorezidentë me 35,5%.
Në zonat bregdetare treguesi i numrit të vizitorëve jorezidentë është rritur me 51,4 %, krahasuar me të njëjtën periudhë të vitit të mëparshëm.
Numri i vizitorëve jorezidentë në “hotele dhe akomodime të ngjashme” ka shënuar rritje me 53,1 %.
Krahasuar me qershorin e 2023-shit, numri i vizitorëve jorezidentë nga Kosova shënoi rritje me 11,9 %, atyre nga Italia shënoi rritje me 8,7 %, nga Polonia me 7,6 %, ndërsa nga Gjermania rrija ishte rritje me 5,9 % Rritje me 3,8 % shënoi edhe numri i vizitorëve britanik.
Raporti i INSTAT jep detaje edhe rreth normave neto të shfrytëzimit të dhomave dhe të shtretërve, dy tregues të cilët masin përqindjen e shfrytëzimit të kapaciteteve akomoduese, dhoma e shtretër të disponueshëm për vizitorë.
Gjatë këtij muaji, norma e shfrytëzimit të dhomave të “hoteleve dhe akomodimeve të ngjashme” është 35,9 %, kundrejt 28,5 % që ishte në muajin qershor 2023.
Norma e shfrytëzimit të shtretërve të “hoteleve dhe akomodimeve të ngjashme” është 38,6 %, kundrejt 30,5 % që ishte në muajin qershor 2023.
Të dhënat e publikuara nga autoritetet treguan se gjatë periudhës janar-korrik vendi u vizitua nga 6,3 milionë vizitorë të huaj nga 5,1 milionë që e vizituan në 7-mujorin e 2023-shit.
Më herët, Komisioni Evropian (ETC) në një raport theksoi se Shqipëria ka dëshmuar një rritje të dukshme të pjesës së tregut sa i takon turizmit, përkatësisht 86% që nga viti 2019.
Në raport thuhet se “vende të vogla si Shqipëria dhe Mali i Zi kanë parë rritjen më të fortë të tregut në 6 muajt e parë të vitit 2024”.
Komisioni Evropian për udhëtimet thotë se, Shqipëria është tërheqëse për turistët e huaj, teksa kohët e fundit është shfaqur një tendencë rritëse e vizitorëve aziatikë.
Sipas raportit, janë të nxitur nga kërkimi i vlerës për përvoja unike, autentike.
Industria e turizmit evropian vazhdoi rimëkëmbjen e saj në tremujorin e dytë të 2024.
Rritja është nxitur nga udhëtimet e fuqishme ndër-rajonale nga Gjermania, Franca, Italia dhe Holanda.
Duke komentuar publikimin e raportit, Miguel Sanz, President i ETC, tha: “Është inkurajuese të shohësh rritjen dhe diversifikimi i peizazhit turistik evropian këtë tremujor. Këtu përfitojnë si destinacionet në zhvillim ashtu edhe pikat e nxehta të krijuara që potencialisht mund të përballen me mbipopullim”.
Gjithashtu ai shtoi se “ne mirëpresim një përhapje më të ekuilibruar të turizmit në të gjithë Evropën, duke kontribuar dhe duke rritur qëndrueshmërinë e industrisë sonë”./Katror.info
Përgatiti:
