Versioni live-action i Disney-t për përrallën klasike “Borëbardha” ka kryesuar në arkën filmike të Amerikës së Veriut, pavarësisht një morie kritikash të vakëta, shkruan BBC, transmeton Katror.info.
Sipas Box Office Mojo, filmi ka arkëtuar rreth 87.3 milionë dollarë (67.5 milionë paund) në mbarë botën gjatë fundjavës së parë të shfaqjes. Gati gjysma e kësaj shifre ka ardhur nga Amerika e Veriut.
Megjithatë, kjo mbetet nën pritshmëritë për një film që raportohet të ketë kushtuar mbi 270 milionë dollarë për t’u realizuar.
Mundesh me e lexu edhe…
Rishikimi i animacionit të gjatë të vitit 1937 fillimisht dukej si një sukses i sigurt, por hasi në një sërë polemikash para publikimit të tij. Ribërja e “Borëbardhës dhe Shtatë Xhuxhave” u shndërrua në një pikë të nxehtë të ndarjeve sociale dhe politike, madje edhe përpara se të mbërrinte në kinematë botërore.
Polemikat përfshinë kritikën ndaj zgjedhjes së Rachel Zegler, e cila ka prejardhje kolumbiane, për rolin e Borëbardhës. Po ashtu, pati reagime të forta ndaj komenteve të Zegler në mbështetje të Palestinës, si dhe ndaj qëndrimeve pro-Izraelit të aktores izraelite Gal Gadot, e cila luan rolin e Njerkës së Keqe.
Gjithashtu, vazhdon debati nëse duhej të kishte xhuxha në film, qofshin ata të luajtur nga aktorë apo të krijuar përmes teknologjisë CGI.
Në Kinë, “Borëbardha” nuk arriti të hynte në pesë filmat më të ndjekur në kinema, sipas faqes China Box Office të EntGroup.
Në këtë vend me mbi 1.4 miliardë banorë, filmi fitoi më pak se 1 milion dollarë gjatë tre ditëve të para të shfaqjes.
“Kam dyshime se polemikat e shumta kanë zbehur tërheqjen e filmit,” tha për BBC-në konsulenti i industrisë së argëtimit, Patrick Frater.
“Kjo, si dhe ndikimi në rënie i shumë prodhimeve të Hollywood-it në Azi, një trend që kemi parë që nga fillimi i pandemisë.”
Në faqen e vlerësimeve Rotten Tomatoes, “Borëbardha” ka një rezultat prej vetëm 44% nga kritikët, ndërsa reagimi i audiencës në “Popcornometer” qëndron në 73%.
Kritiku kryesor i filmit për “The Times”, Kevin Maher, tha: “Besojini anti-reklamave, është vërtet kaq keq.” Ndërkohë, David Rooney i “The Hollywood Reporter” e quajti filmin “kryesisht magjepsës”.
Me xhuxha të krijuar përmes CGI dhe një ton të paqartë, ribërja më e fundit e Disney-t në versionin live-action “nuk është një katastrofë”, por mbetet “një përzierje befasuese e elementeve të ndryshme”, sipas Nicholas Barber të BBC-së./Katror.info
Përgatiti:
