Delegacioni nga Banka Qendrore e Republikës së Kosovës (BQK), i kryesuar nga Zëvendës-guvernatori Dardan Fusha, mori pjesë në Forumin e Bankave Qendrore dhe Fondeve Sovrane, në kuadër të Samitit Global të Fondeve dhe Financimit (GFF), të mbajtur në Qendrën Evropiane të Konventave në Luksemburg, shkruan RTK.
Kjo ngjarje mblodhi aktorë kyç të industrisë financiare globale për të diskutuar avancimet në fushën e pagesave, instrumenteve financiare, fondeve sovrane dhe menaxhimit të rezervave.
Gjatë vizitës, delegacioni i BQK-së zhvilloi takime me z. Philip Brown, Drejtor të Përgjithshëm, dhe përfaqësues të tjerë të Clearstream Banking SA, një nga institucionet kryesore të tregtimit, shlyerjes dhe depozitimit të instrumenteve financiare në Evropë. Diskutimet u fokusuan në vendosjen e marrëdhënieve përmes hapjes së llogarive, me qëllim lehtësimin e operacioneve të menaxhimit të rezervave të BQK-së dhe mundësimin e menaxhimit më efikas të instrumenteve financiare dhe kolateralit.
Mundesh me e lexu edhe…
Zëvendësguvernatori Fusha dhe ekipi i tij u takuan gjithashtu me zj. Claire Alexandre, përgjegjëse për Marrëdhëniet me Qeveritë Ndërkombëtare në PayPal, për të eksploruar mundësitë e bashkëpunimit në ofrimin e shërbimeve të PayPal për qytetarët dhe bizneset e Kosovës. Të dyja palët u pajtuan se një partneritet i tillë do të përbënte një hap të rëndësishëm drejt zgjerimit të qasjes në pagesat ndërkombëtare dhe promovimit të përfshirjes financiare, duke u angazhuar për të vazhduar punën në këtë drejtim.
“Këto takime janë në përputhje me qëllimet strategjike të BQK-së dhe angazhimet për avancimin e infrastrukturës së pagesave dhe instrumenteve financiare, integrimin me tregun e përbashkët evropian dhe promovimin e digjitalizimit të shërbimeve financiare, sipas standardeve globale dhe zhvillimeve teknologjike”, thuhet në njoftimin e BQK-së./Katror.info
Përgatiti:
