Delegacioni i nivelit të lartë i Bankës Qendrore të Kosovës (BQK), i kryesuar nga Guvernatori Ahmet Ismaili, përfundoi me sukses pjesëmarrjen në Takimet Vjetore 2025 të Fondit Monetar Ndërkombëtar dhe Bankës Botërore, të mbajtura në Washington DC nga 13 deri më 18 tetor.
Gjatë vizitës, delegacioni zhvilloi takime bilaterale me guvernatorë dhe zyrtarë të institucioneve financiare ndërkombëtare, duke përfshirë drejtues të FMN-së dhe Bankës Botërore, si dhe përfaqësues nga bankat qendrore të vendeve të Ballkanit dhe Evropës, njofton zyra për informim e BQK-së.
Guvernatori Ismaili mori pjesë si folës dhe diskutant në panele dhe sesione të nivelit të lartë, përfshirë:
Mundesh me e lexu edhe…
Panelin e FMN-së “Fuqizimi i qëndrueshmërisë së sistemit financiar në kohëra të pasigurive”;
Sesionin “Nxitja e Produktivitetit në Evropë dhe Azinë Qendrore” të organizuar nga Banka Botërore;
Ceremoninë e nënshkrimit të Letrës së Qëllimit ndërmjet pesë vendeve të Ballkanit Perëndimor dhe Bankës së Italisë për projektin TIPS Clone;
Mbledhjen e Konstituencës së Bankës Botërore;
Takimin Plenar të Komitetit Ndërkombëtar Monetar dhe Financiar (IMFC) dhe Forumin e FMN-së për Perspektivën Ekonomike Rajonale për Evropën (REO).
Delegacioni paraqiti zhvillimet kryesore në sektorin financiar, prioritetet strategjike të BQK-së dhe përparimet në implementimin e programeve dhe asistencës teknike profesionale.
BQK shpreh mirënjohje të veçantë ndaj Hajdar Korbit, këshilltar dhe përfaqësues i Kosovës në Drejtorinë Ekzekutive të FMN-së, për mbështetjen gjatë pjesëmarrjes në këto ngjarje ndërkombëtare./RTK/Katror.info
