Banka Qendrore e Republikës së Kosovës njofton se ka shtuar dy shërbime financiare në platformën shtetërore eKosova dhe kontribuon në lehtësimin e shërbimeve që ofron Fondi i Kursimeve Pensionale të Kosovës, shkruan RTK.
BQK, thotë se në kuadër të angazhimeve të saj për të mbështetur lehtësimin e qasjen në financa përmes digjitalizimit të shërbimeve financiare, në pajtim me Planin Strategjik dhe në bashkëpunim me Agjencinë e Shoqërisë së Informacionit ka vendosur të shtoi në platformën shtetërore eKosova dy shërbime të saj: Regjistrin e Llogarive si dhe Regjistrin e Kredive të Kosovës. Kjo është e bërë e mundur përmes nënshkrimit të një Memorandumi të Bashkëpunimit ndërmjet dy institucioneve si dhe zhvillimeve të nevojshme teknike.
“Me këto zhvillime, përmes platformës shtetërore eKosova, qytetarët pa kosto do të kenë mundësi të verifikojnë llogaritë e tyre në institucionet financiare të cilat raportojnë në Regjistrin e Llogarive, duke përfshirë statusin e llogarisë, si dhe mund të përdorin atë për qëllime të nevojave personale në zbatim të kërkesave tjera administrative”, thuhet në njoftimin e BQK-së.
Mundesh me e lexu edhe...
Gjithashtu, do të kenë mundësi të nxjerrin Raportin Kreditor individual direkt nga platforma shtetërore eKosova, pa pasur nevojë ta kërkojnë në mënyrë fizike nga BQK-ja.
“Po ashtu, për të lehtësuar procesin e tërheqjen së kursimeve pensionale të të pensionuarve, BQK-ja ka lidhur Memorandumin e Bashkëpunimit me Fondin e Kursimeve Pensionale të Kosovës, përmes të cilit mundësohet validimi i drejtpërdrejtë i llogarive të qytetarëve, duke siguruar një proces më efikas për të pensionuarit, si dhe duke eliminuar vonesat dhe sfidat që lidhen me konfirmimet tradicionale nga bankat”, njofton pos tjerash BQK./Katror.info
Përgatiti:
