Në errësirën e dimrit, në një vend ku nuk ka ndriçim rrugor, një pemë Krishtlindjesh është rritur aq shumë sa njerëzit mund të shohin dritat e saj vezulluese nga kilometra larg.
Në fakt, i gjithë qyteti Inkberrow, në Worcestershire të Anglisë, mblidhet çdo vit në Pepper Street për ceremoninë vjetore të ‘Ndezjes së Dritave’.
Avril dhe Christopher Rowlands e blenë bredhin e vogël për 6 dollarë në vitin 1978 dhe pas Krishtlindjeve e mbollën në oborrin e tyre për të shënuar festën e parë në shtëpinë e re.
Mundesh me e lexu edhe…
Pas 45 vitesh kujdesjeje, bredhi ka arritur një lartësi prej 16 metrash, dhe çifti tani në të 80-at vazhdon ende ta zbukurojë me drita çdo dhjetor duke ofruar një dritë madhështore në një fshat të errët, pa ndriçim në horizont.
Për dy dekadat e fundit, çifti ka pasur nevojë për ndihmën e një platforme të lëvizshme për të dekoruar pemën me mijëra drita, pasi tani ajo ngrihet mbi shtëpinë e tyre me 4 dhoma gjumi.
Përtej përfitimeve të bashkimit të qytetit dhe tërheqjes së turistëve nga vende të ndryshme, familja Rowlands ka mbledhur më shumë se 25,000 £ për bamirësi, duke përfshirë Fondacionin Britanik të Zemrës dhe Kërkimet për Alzheimer në Mbretërinë e Bashkuar, shkruan Good News Network, përcjell Katror.info.
Në vitin 2022, ata mblodhën 3,000 £ për Bankën Ushqimore të Worcester, dhe këtë vit shpresojnë të mbledhin mijëra donacione për shërbimin e Ambulancës Ajrore të Midlands.
Pavarësisht kostove të energjisë për ndriçimin e pemës, çifti vazhdon traditën vjetore, e cila tërhoqi rreth 2,000 persona për të parë ndezjen e saj në mbrëmjen e 6 dhjetorit.
“Është e jashtëzakonshme të mendosh se e blemë pemën si një fidan të vogël,” tha Avril, një shkrimtare televizive në pension.
“Nuk e kishim idenë se do të rritej kaq shumë, por jemi të lumtur që ndodhi. Çdo vit, njerëzit thonë se ndezja e dritave të pemës shënon fillimin e Krishtlindjeve.”
Çifti do t’i ndezë dritat çdo natë nga ora 16:30 deri në 21:30 deri më 6 janar.
Avril pranoi se mirëmbajtja e pemës po bëhet gjithnjë e më sfiduese për shkak të madhësisë së saj.
“Pema pati një sëmundje vitin e kaluar, por i krasitëm degët e poshtme dhe vendosëm shtylla prej druri për ta mbështetur, dhe nuk ka qenë kurrë më e bukur.”
“Natyrisht, Chris dhe unë po plakemi, unë mbush 80 vitin e ardhshëm, por nuk kemi asnjë plan për të ndaluar ndezjen e dritave të Krishtlindjeve.”
“Nuk do ta dinim çfarë të bënim nëse nuk do ta bënim këtë çdo vit. Ka qenë një traditë për fshatin dhe më gjerë gjë që është e mrekullueshme.” /Katror.info
Përgatiti:
