Në zemër të Sharrit, më 16 gusht, do të mbahet koncerti “Damn the Dams – Liro Lumenjtë!”, një aktivitet artistik dhe sensibilizues kundër ndërtimit të hidrocentraleve në parqet kombëtare të Kosovës, shkruan Katror.info.
Eventi, i organizuar nga EcoZ, do të nisë në orën 19:00 tek parkingu i Hotel Molika në Brezovicë dhe do të sjellë në skenë artistë të njohur si Dren Abazi, Alban Nimani dhe DJ Angler, të cilët me muzikën e tyre do t’i japin zë thirrjes për mbrojtjen e natyrës.
Përveç muzikës, pjesëmarrësit do të kenë mundësinë të shijojnë panairin e produkteve tradicionale të përgatitura nga komuniteti lokal, përfshirë mjaltë, djathë dhe prodhime të tjera bio, duke mbështetur kështu edhe banorët që ruajnë trashëgiminë natyrore të zonës.
Mundesh me e lexu edhe…
Hyrja në koncert është falas, ndërsa për të marrë pjesë është e nevojshme regjistrimi paraprak përmes formularit online. Organizatorët kanë siguruar gjithashtu transport falas nga Prishtina, me nisje nga Stacioni i Autobusëve në orën 15:30, por me vende të kufizuara.
Koncerti synon të ndërgjegjësojë publikun dhe institucionet për rrezikun që paraqesin hidrocentralet në ekosistemin e lumenjve dhe parqeve kombëtare, duke përcjellë mesazhin e qartë: “Damn the Dams – Liro Lumenjtë!”./Katror.info
