Ethel Caterham, një grua britanike që jeton në një shtëpi kujdesi në Surrey, është shpallur zyrtarisht si personi më i moshuar në botë në moshën 115 vjeç e 252 ditë, konfirmon LongeviQuest dhe Libri i Rekordeve Guinness, shkruan SkyNews, përcjell Katror.info.
Titulli i është dhënë pas vdekjes më 30 prill të mbajtëses së mëparshme të rekordeve, motra braziliane Inah Canabarro Lucas, e cila kishte mbushur 116 vjeç.
Zonja Caterham është tashmë personi i fundit i gjallë që ka lindur në vitin 1909 dhe një nga të mbijetuarat më të moshuara të COVID-19, pasi e kishte kaluar virusin në moshën 110-vjeçare në vitin 2020.
Mundesh me e lexu edhe…
Në një intervistë për Salisbury Journal, ajo zbuloi sekretin e jetëgjatësisë: “Thuaj ‘po’ çdo mundësie, sepse nuk e di kurrë ku të çon. Mbaj një qëndrim pozitiv dhe bëj gjithçka me masë.”
Ethel ka kaluar jetën mes Anglisë, Indisë, Hong Kongut dhe Gjibraltarit, duke punuar si dado dhe më pas duke hapur një çerdhe në Azi. Ajo u martua me një major britanik në Katedralen e Salisburyt në vitin 1933 dhe jetuan bashkë deri në vdekjen e tij në vitin 1976. Ethel ka humbur edhe dy vajzat e saj, Gem dhe Anne, të cilat vdiqën pas vitit 2000.
Sot, ajo vazhdon të jetë në gjendje të mirë shëndetësore dhe kalon kohë në kopshtin e shtëpisë së kujdesit që tashmë mban emrin “Kopshti i Ethel-it”, në nder të saj./Katror.info.
