Krahas ekipit olimpik të Kosovës, Lojërat Olimpike Paris 2024 do të kenë edhe një tjetër përfaqësues nga vendi ynë.
Është Bujar Shabani, ortopedi i përzgjedhur nga Komiteti Olimpik Ndërkombëtar (IOC), për t’i shërbyer sportistëve olimpistë nga e mbarë bota gjatë Lojërave Olimpike Paris 2024.
Bujari, falë edhe mbështetjes së KOK-ut, ka përfunduar shkollën sportive, të vetmen të akredituar nga IOC për t’u përzgjedhur më pas si mjek sportiv në spitalin olimpik, që ndodhet në Fshatin Olimpik në Paris 2024.
Mundesh me e lexu edhe...
“Fakultetin e Mjekësisë e kam përfunduar në Universitetin e Prishtinës, specializimin e kam filluar ne Lyon, Francë, derisa gjysmën e fundit e kam përfunduar në Prishtinë, QKUK. Doktoratën e kam përfunduar po ashtu në Lyon, Francë, me tematikë rreth Ligamentit të Kryqëzuar të Përparmë (ACL), që është njëra nga lëndimet më të shpeshta sportive.
Me të përfunduar specializimin fillova punën si ortoped në Klinikën e Ortopedisë – QKUK dhe ne Spitalin Otrila. Gjatë periudhës së specializimit dhe si ortoped, kam ndjekur shumë konferenca dhe ‘fellowshipe’ në gjithë botën”, tha Shabani në një intervistë për KOK.
Gjatë qëndrimit 3 vjeçar në Lyon (Francë) Shabani ka marrë edhe shumë bursa, të tilla si: bursa nga Qeveria Amerikane – ‘Fulbright’ në njërin nga universitetet më me renome në botë Johns Hopkins University (6 muaj), ‘fellowshipi’ në Azi (Japoni, Kine, Qatar) mbështetur nga ISAKOS (“International Society of Arthroscopy, Knee Surgery and Orthopaedic Sports Medicine”), ‘fellowshipi’ në SHBA (“Sacramento, New York, Boston, New Mexico”) po ashtu mbështetur nga ISAKOS, ‘fellowshipi’ në Europe (11 qendrat më të njohura për kirurgji të nyjës së gjurit) mbështetur nga EKS (European Knee Society) etj.
Ndërkaq çka e lidh Shabanin me sportin, sipas tij është babai i tij.
“Dashuria me sportin më lidh nga fëmijëria. Babai im i ndjerë ka qenë dashamirës i madh i sportit, sidomos futbollit. Unë gjate rritjes kam ndjekur pothuajse secilën lojë në Ligën e Kosovës me të. Edhe pasi u bëra mjek, doja që të isha pjesë e sportit. Kjo ka qenë edhe arsyeja kryesore që unë kam zgjedhur si fushë veprimi Ortopedinë. Kjo më ka mundësuar që të jem sa më afër me sportistët”, shtoi Shabani.
Ndërkaq në pyetjes se si i erdhi ideja që të aplikoi për të qenë ortoped gjatë Lojërave Olimpike Paris 2024, ai theksoi se ishte përfundimi i shkollës sportive.
“Në vitin 2022 kam përfunduar shkollën sportive, e vetmja e akredituar nga Komiteti Olimpik Ndërkombëtar (IOC). Këtu ka lindur ideja, fillimisht që të jem pjesë e Lojërave Olimpike Paris 2024. Përkundër sfidave të shumta drejt këtij suksesi, puna ime, përvoja e lartcekur, ka bërë që të tejkalohen të gjitha këto sfida, përfshirë edhe ato politike dhe unë të jem pjesë e Lojërave Olimpike Paris 2024. Vlen të përmendet që unë do të jem pjesë e spitalit olimpik në kuadër të Fshatit Olimpik dhe do të përkujdesem për të gjithë atletët nga e gjithë bota përgjatë Lojërave Olimpike”, tha Shabani.
Sipas tij është privilegj i madh që ai të jetë mjeku i parë shqiptar në histori të Lojërave Olimpike.
“Kjo do të thotë shumë për mua, sepse do të jem mjeku i parë shqiptar në histori të Lojërave Olimpike, që do të jem me këtë pozitë. Sa do të jetë privilegj, në të njëjtën kohë do të jetë edhe përgjegjësi. Pjesë e stafit mjekësor në këto Lojëra do të jenë mjekët më me renome në botë dhe puna me ta do të jetë përvojë e jashtëzakonshme për mua. Kjo do të thotë shumë edhe për shtetin tonë, sepse nga pak ortoped që do të jenë atje, njëri nga ta do të jetë nga Kosova. Po ashtu, përvojën time nga kjo ngjarje do ta përcjelli në vendin tonë dhe gjithashtu është hapur rruga edhe për mjekët tjerë që dëshirojnë të jenë pjesë e kësaj ngjarje sportive madhështore”, përfundoi Shabani./Katror.info
Përgatiti:
