Buzëqeshje dhe shpresë: Kauzat vullnetare në ndihmë të fëmijëve

Fëmijët zakonisht i gëzohen ardhjes së fundvitit, për shkak të dhuratave dhe natyrës festive që ka, por ajo që e bën edhe më të veçantë këtë periudhë është eventi tashmë tradicional “Vrapo Babadimër” ku me anë të një mini maratone atraktive, bëhën përpjekje që të shpëtohen jetë fëmijësh, prandaj edhe ne si katroristë iu bashkuam kësaj kauze.

Rreth 3500 pjesëmarrës, kontribuan në këtë kauzë humanitare për fëmijët e shtrirë në repartin e Hemato – Onkologjisë në Spitalin Pediatrik në Prishtinë, për detajet e së cilës foli organizatori i këtij aktiviteti, Jusuf Islami.

“Nga kjo kauzë, që qëllimin në radhë të parë e ka humanitar, do të ndihmohet reparti i Hemato – Onkologjisë në Pediatri me shtretër për nga ana kujdestare 24 orë, për lodra pas terapisë, për trajtimin psikologjik të fëmijëve dhe për maskotat për festat e fundvitit, ndërsa ana tjetër edhe më humane, do të ndihmohen rreth 250 familje për fundvit me gjëra ushqimore dhe dhurata”, shprehet Jusufi.

Kjo kauzë e cila kishte filluar me më pak se 100 babadimra, për të arritur në 3500, sa ishin këtë vit, tregon anën e fuqishme që mbart në vete puna humanitare dhe pjesëmarrja vullnetare e secilit individ në shoqëri.

“Puna vullnetare është shumë e rëndësishme sepse, nëse e krahasojmë me vitin e  kaluar kanë qenë 10 vetë, ndërsa këtë vit kanë qenë 80 vullnetarë që kanë shpreh dëshirën me bo një mirëorganizim, prandaj sot ka qenë gjithqka nga A deri në Zh ku asgjë nuk ka mungu. Pa dyshim që këto kauza duhet me u mbështet, mos të harrojë që ishte edhe KFORI mbështetës dhe më dhuruan këtë simbolikë, që nënkupton që jam i vlerësuar,’ shtoi Jusuf Islami.

Pjesëmarrësit ishin fëmijë dhe të rritur, të cilët i bashkonte i njëjti qëllim.

“Fillimisht unë kam marrë ftesë prej vajzës sime Rita, që e kam këtu pranë, edhe është hera e parë që unë i veshi këto rroba. Është një projekt madhor me quajt ashtu, edhe më vjen shumë mirë që është përkrahur prej institucioneve shtetërore, këtë vit po shihet dora e shtetit dhe vetë organizimi flet, ndërsa vetë tematika e këtij në ndihmë të fëmijëve konkretisht, në repartin e Onkologjisë është një projekt që duhet të mbështetet prej secilit, me përkrahë kush ma pak e kush më shumë,” u shpreh Bujar Gashi.

“Kam dashtë me u bashkangjit për arsye se është e nevojshme për fëmijët e tjerë, për onkologji,’’ tha Rita Gashi.

Puna vullnetare në këtë aktivitet ishte e shumëllojshme, disa iu bashkuan me blerjen e rrobave të babadimrit, disa dhuruan donacione, e kishte prej atyre që ndër të tjera kontribuan edhe në mirëmbajtjen e organizimit.

” Jam bashkangjit, sepse arsyeja më është dukur tepër e mirë. Krejt paratë që mblidhen shkojnë në repartin e Onkologjisë në Pediatri. Edhe pse ndoshta të gjithë e kanë një kohë të caktuar dhe janë të zënë, është mirë me i’u bashkangjitë këtij aktiviteti, sepse është bamirësi, humanizëm dhe solidaritet”, tha Fatbardha Curraj.

Aktivitetit ‘’Vrapo Babadimër’’ i parapriu edhe projekti “Superheronjtë në Pediatri” me po të njëjtin qëllim, ku Klubi Alpin Prishtina dhe Organizata ‘Care for Kosova Kids’, organizuan ngjarjen me alpinistët e maskuar si superheronj, të cilët u lëshuan me litar nga ballkonet dhe dritaret e Pediatrisë, dhe i gëzuan fëmijët me dhurata.

Të emocionuar nga ky mini spektakël, fëmijët patën rastin t’i përqafonin dhe të fotografoheshin me superheronjtë e tyre.

Ndërsa organizatorët e kësaj ngjarjeje u shprehen se arritja kryesore nga ky aktivitet ndër të tjera është edhe ndikimi pozitiv në gjendjen shpirtërore të fëmijëve.

“Është një aktivitet që për qëllim  kryesor ka ngritjen e fondeve dhe ngritjen e vetëdijesimit për fëmijët të cilët janë të diagnostikuar me kancer, e që gjenden në klinikën e Hemato – Onkologjisë në Pediatri”, tha Mrika Karaqi – Care for Kosovo Kids

“Aktivitete të tilla sikur ky i sotshmi, janë shumë të mirëseardhura, për arsye se përveç aspektit shëndetësor, është edhe ky trajtimi shpirtëror,” thotë Elvir Azizi, drejtor i Shërbimit Spitalor Universitar të Kosovës (SHSKUK).

“Ne si Bankë Ekonomike, nuk jemi rastësisht këtu, buzëqeshjet e këtyre fëmijëve janë motiv që të mbështesim evente dhe organizime të tilla’’, u shpreh Shpend Luzha – Banka Ekonomike e Kosovës.

Ndërsa organizatori i këtij projekti humanitar, njëherësh edhe drejtor i Klubit Alpin Prishtina, Nazi Hasanramaj, thotë se organizime të tilla kanë për qëllim filantropinë.

“Është viti i katërt me radhë që mbahet, është një iniciativë e mëhershme, do të bëhet në baza vullnetare edhe qëllimi kryesor është filantropia, që do të thotë  vetëdijesimi dhe mbledhja e mjeteve për fëmijët e shtrirë në Pediatri, me theks në Klinikën e Onkologjisë. Inkurajoj klubet tjera me fillue vetë, mos me prit gjithmonë prej institucioneve, mos me prit gjithmonë prej organizatave tjera, sepse kryesisht këto bëhen në baza vullnetare edhe nëse organizohen mirë kanë me pasë përkrahje prej sektorit privat, sikur rasti jonë që është Banka Ekonomike, është Uji Rugove, është Spar, Red Bull, ka edhe shumë të tjerë që nuk po më bijnë ndërmend për momentin, por që duhet me qenë proaktiv në këtë rast, sepse në disa qytete të Kosovës ka Klinika të Pediatrisë ku mundemi me përsëritë të njëjtën aktivitet, ne kemi mjaft përvojë, mundemi edhe me i përkrah nga pak me pajisje dhe me metoda të lëshimit, mirëpo kryesore është me pas vullnetin”, shprehet Hasanramaj.

Klubi Alpin Prishtina, tash e disa vite organizon aktivitete të ndryshme filantrope, të cilat mund shërbejnë si shembull i veprimtarisë humane në Kosovë.

“Ky është vetëm një në kuptimin e filantropisë, përndryshe Klubi Alpin Prishtina bën hiking me personat e verbër, edhe me pensionistët, edhe se këtë e quajmë sektorin e përgjegjësisë sociale, ka mjaft shumë aktivitete, ndoshta brenda vitit janë diku rreth njëzet, përafërsisht”, tha Nazi Hasanramaj.

Kauza të tilla humane fillojnë duke u mbështetur në ndihma të vogla vullnetare, por që qëllimi i mirë i tyre bën që ato të rriten dhe të përkrahen më jo vetëm nga vullnetarë, por edhe nga institucione. Edhe nëse ndryshimet pozitive mund të jenë të vogla, të paktën iu kthejnë buzëqeshjen për një ditë atyre që më së shumti kanë nevojë. /Katror.info

Edicionin #32 të plotë e gjeni KËTU 🙂